အလငျးရောငျ ဓမ်မ: 🍃🌸 မေတ္တာဆိုတာ 🌸🍃 လူတိုင်း အမှန်တရားလက်ကိုင်ထားတယ်လို့ ပြောကြတယ် ... ဒါပေမယ့် လူကြားထဲ အမှန်အတိုင်း သွားပြောရင် အဆင်မပြေ ဖြစ်ကြတာ များတယ်။ ဒီအမှန်ဆိုတာက ကိုယ်ထင်ထားတဲ့ ကိုယ့်ရဲ့အမှန်ဖြစ်နေလို့။ အိမ်မှာ - ကိုယ်က မှန်အောင်နေတယ်၊ ဒါပေမဲ့ တစ်အိမ်လုံးနဲ့ အဆင်မပြေ ဖြစ်တယ်။ ကိုယ့်ရဲ့အမှန်ဆိုတာက ကိုယ်ထင်ထားတဲ့အမှန်ဖြစ်နေလို့။ ကိုယ့်အတွက်ကမှန်တယ် ၊ ဒါပေမယ့် အားလုံးနဲ့ အဆင်မပြေဘူး၊ မနေတတ်သေးလို့နဲ့ တူပါတယ်။ ကိုယ်အမှန်လို့ထင်ထားတာတွေက မှားများးနေပြီလား ... သူ အဆင်မပြေဘူး ... ကိုယ် အဆင်ပြေနေတယ် ... ဒီအချိန်မှာ ကိုယ့်ဆီမှာ သနားကြင်နာတဲ့ စိတ်ကလေး ရှိနေဖို့ လိုတယ်။ ကိုယ့်ကံနဲ့ ကိုယ်လာတာ ... ဆိုတဲ့ စကားကို အဆင်ပြေနေတဲ့သူက အဆင်မပြေဖြစ်နေတဲ့သူကို ပြောလိုက်တဲ့ အခါ - မှန်တော့ မှန်တယ်၊ ဒါပေမယ့် ခံရတဲ့သူ ... ကြားရတဲ့သူ အတွက် အဆင်မပြေနိုင်ဘူး၊ ခံရခက်တယ်။ "ဗြဟ္မာ့ဝိဟာရ တရားလေးပါး" နဲ့ နေနိုင်မှ အားလုံးနဲ့ အဆင်ပြေမယ်။ ဗြဟ္မာ့ဝိဟာရ တရားလေးပါးဆိုတာ ... မေတ္တာ၊ ကရုဏာ၊ မုဒိတာ၊ ဥပေက္ခာ တရားတွေကို ခေါ်တာ။ မေတ္တာထားပါ... သနားရမယ့်သူကို သနားပါ... သူများကြီးပွားချမ်းသာနေတာကို မုဒိတာပွားပါ... ဥပေက္ခာပြုသင့်တာကို ဥပေက္ခာပြုပါ... ကိုယ်က လူတစ်ယောက်ကို မေတ္တာထားလို့လည်း မရဘူး၊ သနားလို့လည်း မရဘူး၊ မုဒိတာပွားလို့လည်း မရဘူး ဆိုရင်တော့ ... ဘယ်လိုမှ လုပ်လို့ မရဘူးဆိုရင်တော့ ... ဥပေက္ခာပြုလိုက်ပါ။ ဈာန်ငါးပါး မှာ ဥပေက္ခာက ပဉ္စမဈာန် ကို ရောက်တယ်။ အိမ်ပူတယ် ဆိုတာ ... အိမ်ကလူတွေ၊ အိမ်မှာနေတဲ့သူတွေ ပူလို့ အိမ်ပူတာ။ ကမ္ဘာကြီးပူတယ် ဆိုတာ ... ကမ္ဘာကြီးမှာနေတဲ့သူတွေ ပူလို့။ ရင်တွေပူတယ် ... စိတ်တွေပူတယ်ဆိုတာ ... စိတ်ထဲမှာ မငြိမ်းချမ်းလို့။ မေတ္တာမထားနိုင်လို့။ လူတွေ ကိုယ်မှန်တယ်ထင်ပြီး ထင်တာလုပ်လေလေ ပိုပူလာလေလေပဲ။ ဒီတော့ မပူအောင် ... မှန်အောင်နေပါ ... ဗြဟ္မာ့ဝိဟာရ တရားနဲ့ နေပါ။ မေတ္တာထားတယ် ဆိုတာ ... လောဘ မဖြစ်အောင် နေတာ။ ကရုဏာ ထားတယ် ဆိုတာ ... ဒေါသ မဖြစ်အောင် နေတာ။ မုဒိတာ ပွားတယ် ဆိုတာ ... လောဘ၊ ဒေါသ မဖြစ်အောင် နေတာ။ ဥပေက္ခာ ထားတယ် ဆိုတာ ... မောဟ မဖြစ်အောင် နေတာ။ မေတ္တာစိတ်ကို ... လက်တစ်ဖျစ်တီး လောက် ... တစ်စက္ကန့်လေးလောက် ထားကြည့်ပါ။ လက်တစ်ဖျစ်လောက် မေတ္တာစိတ်ထားတာနဲ့ ... လက်တစ်ဖျစ်စာ သီလလုံတယ် ... သမာဓိရတယ် ... လက်တစ်ဖျစ်စာ သီလ၊ သမာဓိ၊ ပညာ သိက္ခာသုံးမျိုးလုံး ကျင့်ပြီးသား ဖြစ်သွားတယ်။ မေတ္တာစိတ်ဖြစ်အောင် ဘယ်လိုလုပ်မလဲ ... မတည့်တဲ့သူ၊ မုန်းတဲ့သူ အကြောင်း မစဉ်းစားနဲ့၊ ချစ်တဲ့သူ အကြောင်းလည်း မစဉ်းစားနဲ့။ မုန်းတဲ့သူ အကြောင်း စဉ်းစားရင် ... ဒေါသ ဖြစ်မယ်။ ချစ်တဲ့သူ အကြောင်း စဉ်းစားရင် ... တဏှာ ဖြစ်မယ်။ တဏှာနဲ့လည်း မချစ်နဲ့ ... ဒေါသနဲ့လည်း မမုန်းနဲ့ ... ကိုယ့်ကိုယ်ကို စပြီး မေတ္တာပို့။ လူတွေ မေတ္တာ နေ့တိုင်းပို့နေကြတယ် ... မေတ္တာသုတ်တွေ ရွတ်တယ် ... ဒါပေမဲ့ တစ်ယောက်ကို တစ်ယောက် တကယ်မေတ္တာ ရှိလို့လား၊ အကျင့်ပါနေလို့ ပို့ကြတာလား။ ကုသိုလ်ရချင်လို့လား။ မေတ္တာဆိုတာ ကိုယ့်မှာ ရှိနေဖို့၊ သူများကို ပေးဝေဖို့ လိုတယ် ... လက်တစ်ဖျစ်စာကနေ ရအောင်လုပ်ကြပါ။ မေတ္တာထားကြပါ။ ကမ္ဘာကြီးပူနွေးလာတာ လူတွေရဲ့ လောဘ၊ ဒေါသ၊ မောဟ တွေကြောင့် ဖြစ်တာ။ တချို့က သစ်ပင်တွေ ခုတ်လို့ လို့ပြောကြတယ်။ တချို့က ဘာတွေသုံးလို့ ညာတွေ သုံးလို့ဆိုပြီးပြောတယ်။ တကယ့်တရားသဘောနဲ့ကြည့်ရင် လောဘ၊ ဒေါသ၊ မောဟ တွေကြောင့်။ လူတွေ သစ်ပင်ခုတ်တယ်၊ ခုတ်တဲ့သူတွေက အခုတ်ခိုင်းတဲ့သူတွေရှိလို့ ခုတ်တယ်၊ အခုတ်ခိုင်းတဲ့ သူတွေက သူတို့ကိုယ်တွင်းက လောဘ၊ ဒေါသ၊ မောဟ တွေကြောင့် အခုတ်ခိုင်းတာ။ မေတ္တာစိတ်ဆိုတာ ပင်ကိုယ်ဓါတ်ခံကောင်းရင် ဖြစ်လွယ်တယ်။ မုန်းစရာ၊ ချစ်စရာ အာရုံတွေကို ရှောင်ပြီး အာရုံပြု၊ ဥပမာ - မိဘကျေးဇူးကို အာရုံပြု၊ ကိုယ့်အကြောင်းကိုယ် စဉ်းစားရင်လည်း အဆင်ပြေတယ်။ မေတ္တာစိတ် ဖြစ်လွယ်တယ်၊။ သူများအကြောင်းတွေ စဉ်းစားရင်တော့ ချစ်တဲ့၊ မုန်းတဲ့စိတ်တွေ ဖြစ်လာနိုင်တယ်။ ကိုယ်နဲ့ မတည့်တဲ့သူအကြောင်းဆိုရင် မစဉ်းစားဘဲနဲ့ ပေါ်နေတတ်တယ်။ မတည့်တဲ့သူ အကြောင်းကို စဉ်းစား၊ ပေါ်လာတဲ့ သူ့မျက်နှာကို မြင်ပြီး ကိုယ်တစ်ယောက်ထဲ ရန်ဖြစ်နေတာ။ တွေးတိုင်း ပြန်ပေါ်တယ်။ မပြီးနိုင်တော့ဘူး။ ဒါ ကိုယ့်လောက် ရူးတဲ့သူ မရှိတော့ဘူးလေ။ ကိုယ့်စိတ်တွေပဲ ပူလောင်လာမယ် ... သူကတော့ သိမှာတောင် မဟုတ်ဘူ။ အိပ်ခါနီး ချက်ချင်း အိပ်မပျော်သေးခင် ... ကိုယ်မေတ္တာပို့နိုင်သူ၊ ကိုယ်မေတ္တာပို့ရမယ့်သူတွေကို - မေတ္တာပို့ပါ။ မနက် အိပ်ယာက နိုးတာနဲ့ နိုးနိုးချင်း မေတ္တာပွားပါ။ ဘယ်သူ့အပေါ်မှ မမုန်းဘဲနေနိုင်တဲ့ အစွမ်း၊ စိတ် ရှိနိုင် ... ထားနိုင်ရမယ်။ အခုခေတ်လူတွေက ကိုယ့်စိတ်ထဲမှာ အချိုးမကျတဲ့သူ၊ ကိုယ်နဲ့စိတ်တိုင်းမကျတဲ့သူကို မြင်လေ မေတ္တာစိတ် ပျောက်လေလေ ဖြစ်တတ်ကြတယ်။ တွေးတာနဲ့တောင် ဒေါသတွေ အမျက်ချောင်းချောင်း ထတတ်ကြတယ်။ အမှန်တရားကိုလည်း ကြိုက်ပါ၊ နေတတ်အောင်လည်း နေပါ။ ကိုယ့်စိတ်တိုင်းကျ၊ အချိုးကျတဲ့သူဆိုတာ မရှိနိုင်ဘူ။ ကိုယ့်ကိုယ်ကိုတောင် စိတ်တိုင်းကျကြရဲ့လား။ ကိုယ့်ဘ၀ကိုတောင် ကိုယ်ကျေနပ်လို့လား။ ကိုယ်ပြင်ပေးလိုက်လို့၊ ကိုယ်ပြောလိုက်လို့ အချိုးကျသွားတယ်ဆိုတဲ့သူ ဘယ်နှစ်ယောက် ရှိခဲ့ဘူးလဲ။ သူ့အပေါ် မေတ္တာမရှိလို့ သူ အချိုးမကျတာ။ ကိုယ့်မှာ မေတ္တာတကယ်ရှိလာရင် မျက်စိထဲမှာ အားလုံး အချိုးကျလာမယ်။ မေတ္တာစိတ်လေးထားတာသည် ... သီးခံခြင်း အကျင့်ကို ကျင့်ရာရောက်တယ်၊ အားလုံး အကျိုးများတယ်။ သီလ၊ သမာဓိ၊ ပညာ ထူထောင်ပြီး ဖြစ်တယ်။ ကိုယ် မေတ္တာပို့ချင်တဲ့သူကို အာရုံစိုက်ပြီးပို့၊ ပြီးရင် လူ၊ သတ္တ၀ါ တွေကို မေတ္တာပို့ ၊ မိဘ၊ ကျေးဇူးရှင် ဆရာသမားတွေကို စူးစိုက် အားထဲ့ပြီး မေတ္တာပို့လိုက်တာနဲ့ အာရုံထဲမှာ သူတို့ပုံတွေ ပေါ်လာမယ်။ ဒီလိုလုပ်တာမှာ ... အားစိုက်ထုတ်တာလေးရှိတယ်။ ရည်မှန်းတဲ့ ဓါတ်ကလေးပါတယ်။ ဒါက သြဒိသ - ရည်စူးပြီးပို့တဲ့ မေတ္တာ။ စိတ်ကို မှန်လို ကြည်အောင်နေ။ မေတ္တာစိတ်လေးနဲ့နေ။ ဒါက အနောဒိသ - မရည်စူးပဲ ပို့တဲ့ မေတ္တာ။ သြဒိသ မေတ္တာမှာ စူးစိုက်တဲ့ ဈာန် သဘောပါတယ်။ ဈာန်က အားးစိုက်ရတယ် ... သူက သမထ။ အနောဒိသ မေတ္တာမှာ ဥာဏ် သဘောပါတယ်။ ဥာဏ်က အားစိုက်ဖို့ မလိုဘူး ... သူက ၀ိပဿနာ။။ တခါတလေ ကိုယ်က ဘုရားရှိခိုးပြီးလို့ စိတ်ကလေးကြည်နေတဲ့ အချိန်မှာ - မေတ္တာပွားနေတဲ့ အချိန်မှာ စိတ်ထဲမှာ - ဖျတ်ကနဲ၊ ဖျတ်ကနဲ ပေါ်လာတဲ့ သူတွေ ကြုံဖူးလိမ့်မယ်။ အဲဒါ ကိုယ့်မေတ္တာကို ခံယူမယ့်သူတွေ ပေါ်လာတာ။ အနောဒိသ မေတ္တာ၊ အဲဒီအချိန်မှာ သူတို့ကို မေတ္တာပို့ပေး။ အဲဒီအချိန်မှာ လောဘ၊ ဒေါသ၊ မောဟ တွေ ဖြစ်မနေဘူး။ ပေါ်လာတဲ့ အာရုံတွေမမြဲတာ ကို သတိလေးထားပေး။ လူတွေ ပေါ်လာတယ် - မေတ္တာပို့တယ် - ပျောက်သွားတယ်။ နောက်တစ်ယောက်ပေါ်လာတယ် - မေတ္တာပို့တယ် - ပျောက်သွားတယ်။ ဒီလို မမြဲတဲ့ သဘော ကို နှလုံးသွင်း ... မေတ္တာပို့နေရင်း ကိုယ့်စိတ်မှာ၊ ကိုယ်မှာ ပီတိ တွေ ဖြစ်လာမယ်။ အဲဒီ ပီတိတွေ ပျက်သွားမယ်။ ဒါတွေဟာ ပီတိကြောင့် ဖြစ်လာတဲ့ ဖြစ် - ပျက် သဘောတွေကို သိလာတာ ... ဒါက ၀ိပဿနာ။ အဲဒီအချိန်မှာ ... စိတ်မဆိုးအောင်၊ ဒေါသမထွက်အောင် သတိထား။ စိတ်ဆိုး ဒေါသထွက်ရင် ကိုယ်ရနေတဲ့ ငြိမ်းချမ်းမှုလေး ဆုံးရှုံးသွားမယ်။ မေတ္တာထားတတ် ပွားတတ်ရင် ... ဈာန်လည်းရမယ်၊ ဥာဏ်လည်းရမယ်။ လက်တစ်ဖျစ်စာ မေတ္တာပွားတဲ့အခါမှာတောင် ဒီလောက် အကျိုးများရင်၊ လက်တစ်ဖျစ်စာပေါင်းများစွာ ... ကြိမ်ဖန်များစွာ ကျင့်လာတဲ့သူတစ်ယောက်အတွက် ဘာမှ ပြောစရာကို မလိုတော့ဘူး။ မေတ္တာ ကို ရှိအောင်လည်း နေပါ။ သူများတွေကိုလည်း ပေးပါ၊ ပို့ပါ။ ပွားလဲ ပွါးပါ။ ဆရာတော် ဓမ္မဒူတ အရှင်ဆေကိန္ဒ