အလင်းရောင် ဓမ္မ: ဘုရားဂုဏ်တော်များများပွားပါ 🙏🙏🙏🙏🙏🙏🙏🙏 နေ့စဉ်နေ့စဉ် ဘုရားဂုဏ်တော်(၉)ပါးကို ပွားများရတယ်။ အဲဒီလို ဘုရားဂုဏ်တော်တွေ ပွားများရင် ဘုရားဓာတ်တွေ တည်ထားတဲ့ပုဂ္ဂိုလ်ပေါ် ဘုရားဓာတ်တွေ ကိန်းလာတယ်။ အဲဒီလိုဘုရားဓာတ်တွေ ကိန်းတော့ ဘုရားရဲ့ဘုန်းတန်ခိုး အာနုဘော်တွေလည်း တဖြည်းဖြည်းကူးလာတယ် . . . ဘုန်းဘုန်းတို့ နှစ်သစ်အချိန်အခါက ကာလ တစ်နှစ်ပြောင်းသွားတော့ သိပ္ပံနည်းအရ နေက ဟိုးဒက္ခိဏအရပ်ကနေ တဖြည်းဖြည်း ရပ်ပြီးတော့ ဒီဘက်ပြန်ပြောင်းလာတာကို နှစ်သစ်လို့ခေါ်တာပေါ့။ ကမ္ဘာကြီးက နေကို ပတ်လှည့်နေတာ။ အဲဒီလိုအချိန်အခါမျိုးမှာ ဒီကမ္ဘာပေါ်မှာရှိတဲ့ လူတွေ၊ နတ်တွေ၊ ဗြဟ္မာတွေ၊ သစ်ပင်တောတောင် ရေမြေတွေလည်း ဥတုအလိုက် နေရဲ့အပူရှိန်နဲ့လိုက်ပြီးတော့ ပြောင်းကြတယ်။ အဲဒီလိုပြောင်းသလို သက်ရှိသတ္တဝါတွေက ဘာပြောင်းရလဲဆိုတော့ အကောင်းဆုံးက နှစ်သစ်မှာဘုရားဂုဏ်တော် ပုတီးစိပ် မေတ္တာပွားတာ အလွန်တရာ ကောင်းပါတယ်။ နေ့စဉ်နေ့စဉ် ဘုရားဂုဏ်တော်(၉)ပါးကို ပွားများရတယ်။ အဲဒီလို ဘုရားဂုဏ်တော်တွေ ပွားများရင် ဘုရားဓာတ်တွေ တည်ထားတဲ့ပုဂ္ဂိုလ်ပေါ် ဘုရားဓာတ်တွေ ကိန်းလာတယ်။ အဲဒီလိုဘုရားဓာတ်တွေ ကိန်းတော့ ဘုရားရဲ့ဘုန်းတန်ခိုးအာနုဘော်တွေလည်း တဖြည်းဖြည်း ကူးလာတယ်။ ဥပမာအားဖြင့် သံလိုက်တုံးကြီးနဲ့ ရိုးရိုးသံလေး အတူထားလိုက်ရင် သံလိုက်တုံးကြီးထဲက သံလိုက်ဓာတ်တွေက ရိုးရိုးသံထဲ ကူးသွားပြီးတော့ ရိုးရိုးသံလေးပါ သံလိုက်ဖြစ်သွားတယ်။ အဲဒီဘုရားဂုဏ်တော် ပုတီးစိပ်ပါများရင် ဒီခန္ဓာကိုယ်ထဲ ဘုရားဓာတ်တွေ ကိန်းသွားတယ်။ ဘုရားဓာတ်တွေ ကိန်းသွားတဲ့အတွက် သေတောင်မှ မပုပ်တော့ဘူး။ ရဟန်းသာများပရိနိဗ္ဗာန်စံရင် မပုပ်သလို ဘုရားဂုဏ်တော် ပုတီးစိတ်တဲ့ ပုဂ္ဂိုလ်များလည်း သေရင်မပုပ်ဘူး။ ဘယ်လောက်ကြာကြာ စိပ်ရမလဲဆိုရင် အနှစ် (၂ဝ) စိပ်ရမယ်။ ဘုရားဂုဏ်တော်ကို အနှစ် (၂ဝ) ပုတီးစိပ်ရင် ဒီခန္ဓာကိုယ်ကြီး မပုပ်တော့ဘူး။ အဲဒီလို ဘုန်းတန်ခိုးကြီးတယ်။ မြတ်စွာဘုရားသခင်ရဲ့ ဂုဏ်တော်တွေ ကိန်းသွားလို့ အဲလိုဂုဏ်တော်တွေ ကိန်းသွားတဲ့ပုဂ္ဂိုလ်က ဖြစ်လေရာ ဘဝသံသရာမှာလည်းပဲ ဘုရားဓာတ်တွေရဲ့ အရှိန်အဝါကြောင့် မြင့်မြတ်တဲ့ အမျိုးအနွယ်ဖြစ် မြင့်မြတ်တဲ့ စည်းစိမ်ဥစ္စာနဲ့ ခံစားရပြီး နောက်ဆုံး နိဗ္ဗာန်ကို မြန်မြန်ရတယ်။ နိဗ္ဗာန်ကို မြန်မြန်လိုချင်တဲ့ ပုဂ္ဂိုလ်သည် ဘုရားဂုဏ်တော်ပုတီးစိပ်၊ မေတ္တာပွား၊ မေတ္တာပွား ဆိုတာကလည်း မေတ္တာဆိုတာ အမျိုးမျိူးရှိတယ်၊ အမျိုးမျိုးရှိတော့ အကျဉ်းချုပ်ဆိုရင်တော့ ကျန်းမာပါစေ၊ ချမ်းသာပါစေလို့ ဒီလိုပွားရတယ်။ သတ္တဝါလေးတွေမြင်ရင် ခွေးဖြစ်ဖြစ်၊ ဝက်ဖြစ်ဖြစ်၊ ကြက်ဖြစ်ဖြစ်၊ ငှက်ဖြစ်ဖြစ်၊ ပုရွက်ဆိတ်ဖြစ်ဖြစ် သတ္တဝါလေးတွေမြင်ရရင် ကျန်းမာပါစေ၊ ချမ်းသာပါစေ၊ အဲဒီလိုမေတ္တာပွားရင်လည်း ဘုရားဓာတ်တွေက ဒီခန္ဓာကိုယ်ကို ကိန်းလာတယ်။ ဘုရားဓာတ်တွေ ကိန်းလာတဲ့အတွက် အဲဒီပုဂ္ဂိုလ်ကို လှူတဲ့တန်းတဲ့လူလည်း ပေါလာတယ်။ ပေးတဲ့ကမ်းတဲ့ ပုဂ္ဂိုလ်တွေလည်း အကျိုးကြီးမားတယ်။ ဘယ့်နှယ့်ကြောင့်ဆိုတော့ ရဟန်းပုဂ္ဂိုလ်များ၊ မြတ်စွာဘုရားများ၊ ပစ္စေကဗုဒ္ဓါများကို လှူလို့ရှိရင် ရိုးရိုးလူကို လှူတာထက်အကျိုးများတယ်။ အဘယ့်ကြောင့်လဲဆိုရင် မြတ်စွာဘုရားရှင် ပစ္စေကဗုဒ္ဓါဆိုတဲ့ ပုဂ္ဂိုလ်တွေက အများအားဖြင့် ဖိုလ်ဝင်စားပြီးတော့နေကြတယ်။ အဲဒီဖိုလ်ရဲ့အာရုံဖြစ်တဲ့ နိဗ္ဗာန်ကလည်း လောကုတ္တရာစိတ်တွေ ဝင်စားပြီး ဒီခန္ဓာကိုယ်က မွှေးကြိုင်သွားတယ်။ ဥပမာအားဖြင့် ရေမွှေး ၊ ပေါင်ဒါ၊ နံ့သာဖြူစတဲ့ အမွှေးနံ့သာကဲ့သို့ ဒီခန္ဓာကိုယ်ကြီးက မွှေးနေတယ်။ ဘုရားဂုဏ်တော်တွေ ပုတီးစိတ်တာများရင် ဒီခန္ဓာကိုယ်ကြီးက သေလည်း မပုပ်တော့ဘူး။ အဲ့ဒီလိုအကျိုးရှိတယ်။ တစ်ယောက်နဲ့တစ်ယောက် မေတ္တာတွေ မပွားနိုင်ကြလို့ ပစ်ကြ၊ ခတ်ကြ၊ သတ်ကြ၊ ပုတ်ကြ၊ ရိုက်ကြ၊ နှက်ကြတာ မေတ္တာမပွားနိုင်လို့ မေတ္တာပွားရင် တစ်ယောက်နှင့်တစ်ယောက် ကိုယ့်ညီလေးတွေလို အကိုကြီးတွေလို၊ သားလေး၊ သမီးလေးတွေလို အောက်မေ့ပြီးတော့ မေတ္တာထားရင် ခိုက်ရန်ဖြစ်တာမရှိတော့ဘူး။ ခိုက်ရန်ဖြစ်တာမရှိတော့ စစ်တိုက်တာတွေ တိုင်းပြည် တစ်ပြည်နှင့်တစ်ပြည် စစ်တွေဖြစ် ဗုံးတွေကြဲ စက်သေနတ်တွေ ပစ်တာမရှိဘူးဆိုရင် တိုင်းပြည် အေးချမ်း သာယာတယ်။ တိုင်းပြည်နဲ့ တစ်ကမ္ဘာလုံးအေးချမ်းအောင် ဘုရားဂုဏ်တော်တွေ ပုတီးစိပ် မေတ္တာပွားကြရမယ်။ အဲ့ဒါကြောင့် နှစ်သစ်အချိန်ခါမှ စပြီးတော့ ကမ္ဘာသူ ကမ္ဘာသား အားလုံးက ဘုရားဂုဏ်တော်ကိုတစ်နေ့ သုံးခါအဖြစ် မနက်အိပ်ရာထတစ်ခါ နေ့လယ် ၁၂ နာရီ တစ်ခါ ညအိပ်ရာဝင် တစ်ခါ ပုတီးစိပ်ပြီး မေတ္တာပွားကြပါ။ မေတ္တာ ပွားခြင်းဖြင့် ကမ္ဘာသူ ကမ္ဘာသား နိုင်ငံသူ နိုင်ငံသားများ ကိုယ်စိတ်နှလုံး ကျန်းမာချမ်းသာကြကုန်စေသတည်း။ ( ဗန်းမော်ဆရာတော်ဘုရားကြီး ဦးကုမာရ ) နိုင်ငံတော်သံဃမဟာနာယကအဖွဲ့ဥက္ကဌ ၂၀၁၇ နှစ်သစ်ကူးဩဝါဒ ။