အလင်းရောင် ဓမ္မ: ဒီခန္ဓာရဲ့သဘာဝကို တကယ်သိမယ်ဆိုရင် ဆင်းရဲဒုက္ခရဲ့အဆုံးကို ပြုနိုင်လိမ့်မယ် ▬▬▬▬▬▬▬▬▬▬▬▬▬▬▬ ခန္ဓာရဲ့ သဘောကို တကယ်သိရင် ဒုက္ခရဲ့ အဆုံးကို ပြုနိုင်လိမ့်မယ်ဆိုတာ အဲဒါကို ပြောတာ။ ဒါကြောင့် ကိုယ်လုပ်နေတဲ့အလုပ်က နယ်နယ်ရရ အလုပ်မဟုတ်ဘူးဆိုတာကိုလည်းပဲ နားလည်ဖို့ လိုပါတယ်။ ပြန်ပြောမယ်…ဒီဂါထာလေးကို ပြန်ပြောမယ်။ ကာယမိမံ သမသထ- ဒီခန္ဓာကိုယ်ကြီး သတိနဲ့ ဉာဏ်နဲ့ မှန်မှန်ကန်ကန် ဆင်ခြင်သုံးသပ်ပြီးတော့ သိသိနေပါ။ ပဋိဇာနာထ ပုနပ္ပုနံ- အဖန်ဖန်အထပ်ထပ် ကြိုးစားပြီးတော့ ပိုင်းပိုင်းခြားခြား သိနိုင်အောင် ကြိုးစားပါ။ ပိုင်းပိုင်းခြားခြား သိတယ်ဆိုတာ အနိစ္စ ဒုက္ခ အနတ္တ လက္ခဏာရေး သုံးပါးကို ပိုင်းခြားပြီးတော့ သိတဲ့သဘောကို ရည်ညွှန်းတာပါ။ ဘယ်လို သဘာဝလေးပဲ ဖြစ်လာဖြစ်လာ ပျောက်ကွယ်လိုက်နေတဲ့ သဘောမျှသာ ဖြစ်တယ်။ နောက်ထပ်အသစ်အသစ် ထပ်ထပ် ဖြစ်ပြန်တာပဲ။ ဖြစ်တိုင်း ဖြစ်တိုင်းလည်းပဲ ပျောက်ကွယ် ပျောက်ကွယ် လိုက်နေတာပဲလို့ သိတာကို ပိုင်းခြားပြီးတော့ သိတယ်လို့ ပြောတာ။ အဲသလို ခန္ဓာရဲ့သဘာဝကို ပိုင်းခြားပြီးတော့ သိနိုင်၊ မြင်နိုင်အောင် အဖန်အဖန် အထပ်ထပ် ကြိုးစားမယ်ဆိုရင် ဒီခန္ဓာကိုယ်ရဲ့သဘာဝကို အမှန်အတိုင်း သိနိုင်တယ်။ ဒါဟာ ဆင်းရဲခြင်းတရားတွေပဲလို့ သိနိုင်တယ်။ အဲသလို ကာယေ သဘာဝံ ဒိသွာန၊ဒီခန္ဓာရဲ့သဘာဝကို တကယ်သိမယ်ဆိုရင် ဒုက္ခဿ၊ဝဋ်ဆင်းရဲရဲ့ ဆင်းရဲဒုက္ခရဲ့။ အန္တံ ၊အဆုံးကို။ ကရိဿတိ၊ ပြုနိုင်လိမ့်မယ်။ ကိုယ့်ခန္ဓာအကြောင်းကို ကိုယ်ကိုယ်တိုင် သိအောင် သတိနဲ့ ဝီရိယနဲ့ ကြိုးစား။ အမှန်အကန် သိလာလို့ရှိရင် ဒီခန္ဓာရဲ့ အပေါ်မှာ တွယ်တာမက်မောတဲ့ သမုဒယသစ္စာ တဏှာလောဘ နည်းပါးရာမှ တစ်ဆင့် ချုပ်ပျောက်ပြီးတော့ ထိုတဏှာ လောဘကြောင့် ဖြစ်လာမယ့် ဆင်းရဲဒုက္ခ အားလုံးဟာ ချုပ်ငြိမ်းသွားနိုင်တယ်လို့ ဒီလို ပြောတာ။ သစ္စာရွှေစည်ဆရာတော်