အလင်းရောင် ဓမ္မ: 🙏တရားနာခြင်းရဲ့ စွမ်းရည်သတ္တိ ====================== တရားဆိုတာ နာရတယ်။ နာလို့ရှိရင် ဒီဘဝ အပြည့်အဝ နားမလည်လည်း မျိုးစေ့ကလေး တော့ ဖြစ်သွားတယ်။ နောင်ဘဝအတွက် မျိုးစေ့ရတယ်ဆိုတာ နည်းတာ မဟုတ်ဘူး။ မျိုးစေ့ကလေး ရသွားနိုင်တယ်။ အေး ဒီလိုလေးတောင် ဘုရားသာသနာနဲ့ ကြုံတဲ့အချိန်လေးမှာ မျိုးစေ့လေးတောင် မရလိုက်လို့ရှိရင် နောင်ဘဝ အပင်ဆိုတာ မမျှော်လင့်လေနဲ့။ သံသရာထဲမှာ မျှော်လင့်စရာ အကြောင်းမရှိဘူး။ ဘုရားနဲ့တွေ့လည်းပဲ မကျွတ်နိုင်တဲ့ နလပိန်းတုန်းပဲ ဖြစ်မှာပဲ။ အေး တရားဓမ္မကို နားမလည်ဘူး။ ဒီဘဝမှာ နားလည်နိုင်တဲ့ စွမ်းအားမရှိခဲ့ဘူး။ နားမလည်ခဲ့ဘူး။ တရားဆိုတဲ့အသံ နားထဲ တောင်မရောက်ဘူးဆိုတဲ့ ပုဂ္ဂိုလ်တွေဟာ နောက်ဘဝလည်းပဲ ရောက်ဖို့ သိပ်မရှိ တော့ဘူး။ ဝေးသထက် ဝေးသွားတတ်တယ်။ ဒါကမဖြစ်ဘူး မပြောနဲ့။ ပဉ္စက္ကပုဏ္ဏား လင်မယား ကဿ ပမြတ်စွာ ဘုရားလက်ထက်က နာမရူပဆိုတဲ့ စကားလုံးနဲ့ ရှင်းဟောတာ တစ်ခါတည်း အနာဂါမ်တန်းဖြစ် တယ်လေ။ ဘာဖြစ်လို့ ဖြစ်တာတုန်းဆိုတော့ "နာမရူပ" ဆိုတဲ့ စကားလုံးလေးကို ကြားခဲ့ဖူးလို့တဲ့။ အတိတ်က အကြောင်းနဲ့ ပြန်ဆက်ပေးတာ။ ဘယ်အရာမှ ပျောက်သွားတာမရှိဘူး၊ online ဖြစ်နေတာ။ ကိုယ့်သန္တာန်မှာ ဖြစ်သွားတဲ့ အသိဉာဏ်တစ်ခုဟာ အခု ခေတ်စကားနဲ့ပြောရင် online ဖြစ်နေတာ။ online ဖြစ်နေတယ်ဆိုတာ နောက်ထပ် အကြောင်းတစ်ခု ပေါင်းလိုက်တာနဲ့ တစ်ပြိုင်နက် သူကပေါ်လာမှာ။ အေး ဒါကြောင့်မို့လို့ မြတ်စွာဘုရား သာသနာနဲ့ ကြုံတွေ့နေတဲ့အချိန်လေးမှာ မိမိတို့ တရားဓမ္မကို လေ့လာသင့်တယ်။ နားလည်အောင် မှတ်ယူသင့်တယ်။ လေ့လာသင့်တယ်။ အဲဒီလို မှတ်ယူလေ့လာခြင်းဟာ ဘယ်တော့မှ အလဟဿ မဖြစ်ဘူးတဲ့။ လုပ်ထားတဲ့ အရာတွေဟာ အလဟဿ သဲထဲရေသွန် ဖြစ်တယ်ဆိုတာ မရှိဘူးတဲ့။ အဲဒါကြောင့်မို့လို့ အင်မတန်မှ ခိုင်မြဲတယ် ဒီအသိဉာဏ်တွေ ဆိုတာ အနိစ္စသဘော တရားအရ ပျောက်သွားပေမယ့်လို့ သူ့ရဲ့ စွမ်းရည်သတ္တိတွေက ကျန်ရစ်တယ်။ ကြည့်လေ ငယ်ငယ်တုန်းက "က ခ" မရေး တတ်တဲ့အချိန်မှာ ဆရာ ဆရာမတွေဆီက သင်ထားတာ ကြီးတော့ ပျောက်သွားလား? ဘယ်ပျောက်မလဲ။ ငယ်ငယ်တုန်းက ရေးတတ်တာ သင်ထား တာဟာ ကြီးတော့ ပျောက်သွားတာမှ မဟုတ် တာ။ အသိဉာဏ်ဆိုတာ ပျောက်မသွားဘူးတဲ့။ ပြန်ပေါ်လာတယ်။ ဒါကြောင့်မို့လို့ တရားဓမ္မကို လေ့လာ လိုက်စားကြရတယ်။ ကျင့်ကြံကြိုးကုတ် အားထုတ်ကြရတယ်။ 🙏🙏🙏 {ပါမောက္ခချုပ်ဆရာတော်ဘုရားကြီး}