အလင်းရောင် ဓမ္မ: အသက်အရွယ်ရလာချိန်မှာ…ငယ်ငယ်တုန်းက အခြေအနေမျိုးကို ပြန်တောင့်တလို့တော့ ဘယ်ရမလဲပေါ့။ လက်ရှိအရွယ်မှာ ကြုံတွေ့ရမယ့် အခြေအနေကိုပဲ လက်ခံရမှာပေါ့။ တောင့်တမှုက ကြောင့်ကြမှုကိုပဲ ဖြစ်စေတာ မဟုတ်လား? အဆင်မပြေတဲ့အခြေအနေမှာ အဆင်ပြေတာလေးတွေကိုပဲ မျှော်လင့်မိမှာပေါ့။ အမြဲတမ်းတော့ ဘယ်သူမှ အဆင်ပြေနေတာ မဟုတ်ဘူးလေ။ အများကြီးမျှော်ရင် အမှားကြီးတွေလည်း ပေါ်လာတတ်တာပဲ မဟုတ်လား? ဘဝဒုက္ခတွေ ကြုံလာတဲ့အခါ သက်သာရာကိုတော့ လိုချင်ကြတာပေါ့။ ဒုက္ခကြီးမှုက နောင်တ တရားနဲ့ သောကပွားမှုကိုလည်း ဖြစ်စေတတ်တာပဲလေ။ သောကကြီးလို့လည်း လောကကြီးက ကိုယ့်အလိုလိုက်တာမှ မဟုတ်တာ။ ကိုယ့်လောကနဲ့ကိုယ် တည့်အောင်နေရမှာပဲ မဟုတ်လား? အရေးကြီးတာက ကိုယ့်အခြေအနေနဲ့ ကိုယ့်အရွယ်အရ တွေ့ကြုံနေရတဲ့ လောကဓံအပေါ် လက်ခံနိုင်ဖို့နဲ့ ရင်ဆိုင်နိုင်ဖို့က အဓိကပါပဲ။ အရွယ်ရလာခြင်း သဘောနဲ့ လောကဓံ ရိုက်ခတ်ခံရခြင်း သဘောကြားမှာ မနောအားကောင်းအောင် ကြိုးစားဖို့ပဲလိုတာပေါ့။ မနောအားကောင်းတယ်ဆိုတာ စိတ်ဖိအားတွေကို ဖယ်ရှားနိုင်ခြင်း သဘောပါပဲ။ "ကိုယ့်စိတ်ကိုယ် ဘာအကြောင်းကြောင့်မှ မလေးအောင်နေတယ်၊ ဘယ်သူ့ဘယ်သူကြောင့်မှ ခံစားရတာမျိုး မဖြစ်စေဘူး၊ ဖြစ်လာရင်လည်း ခဏပဲ၊ အကြာကြီး မခံစားစေဘူး" အဲ့လို နေထိုင်ကျင့်သုံးနိုင်ရင် ရုပ်ကျပေမယ့် စိတ်မကျဘူး။ ရုပ်အိုပေမယ့် စိတ်မအိုဘူး။ စိတ်လှနေသမျှ ရုပ်ကျနေလို့ ရုပ်မလှလည်း ပြဿနာ မဟုတ်ပါဘူးလေ။ 🙏မနာပ ဒါယီ အရှင်ဝိစိတ္တ🙏