အလင်းရောင် ဓမ္မ: လောကဓံရင်ဆိုင်နည်း ❇❇❇❇❇❇❇ ကိုယ်လုပ်ရမှာက ... စိတ်ဓာတ်ကြံ့ခိုင်အောင်ထားဖို့ပဲ။ မြတ်စွာဘုရားက အင်္ဂုတ္တရနိကာယ် အဋ္ဌကနိပါတ်လောကဓမ္မသုတ္တန်မှာ စိတ်ဓာတ်ကြံ့ခိုင်အောင်ထားနည်း ပေးထားတယ်။ “လာဘ”လောကဓံနဲ့ ကြုံလာတယ်ဆိုပါစို့။ ငါလိုချင်တာတော့ ရလာပြီ၊ ရလာတဲ့ဟာသည် ထာဝရလား တစ်ခဏလား စဉ်းစားကြည့်လိုက်ပါတဲ့။ လောကမှာ ထာဝရဆိုတာ တစ်ခုမျှမရှိဘူး။ ၁) အနိစ္စ - မြဲတဲ့သဘောမရှိဘူး။ ၂) ဝိပရိဏာမဓမ္မ - ရခြင်းကနေ မရခြင်းအဖြစ် ပြောင်းသွားနိုင်သေးတယ်။ ၃) အညထာဘာဝ - တစ်မျိုးတစ်ဖုံ ဖြစ်သွားနိုင်သေးတယ်။ ဒီလိုတွေးပေးပါတဲ့။ မရဘူးဆိုရင်လည်း၊ “အလာဘ ́လောကဓံနဲ့ ကြုံလာရင်လည်း ဒီလိုပဲ စဉ်းစားပါတဲ့။ မရဘူးဆိုတာလည်း တစ်ခဏပဲ။ အခြေအနေပေးလာရင် ရမှာပေါ့။ မရသေးခင်မှာ ရှိတာနဲ့ ငါရောင့်ရဲရမယ်။ ထပ်ပြီးတော့ ကြိုးစားရမယ်။ မရဘူးဆိုတာလည်း နိစ္စ ထာဝရ မဟုတ်ဘူး၊ အနိစ္စ တစ်ခဏမျှသာ ဖြစ်တယ်။ မမြဲတဲ့သဘော၊ တစ်ချိန်ကျ ပြောင်းလဲလာဦးမှာပဲ။ ဒီလို ကိုယ့်စိတ်ကိုယ် ထိန်းရတယ်။ နောက်တစ်ခု စဉ်းစားနည်းလည်း ပေးထားတယ်။ လာဘဆိုတဲ့ လောကဓံနဲ့ ကြုံလာတယ်။ အောင်မြင်ကြီးပွားလာတယ် ဆိုပါစို့။ အောင်မြင်ကြီးပွားမှုကို ဝမ်းသာပြီးတော့ ငါ မာန်မာနတွေ တက်ကြွနေမယ်ဆိုရင် ဘေးကလည်း အမြင်ကတ်လာနိုင်တယ်။ ငါ့ဘာသာငါလည်း အကျိုးရှိတာလုပ်ရမယ်ဆိုတဲ့ အသိဉာဏ်လည်း ဖြစ်တော့မှာ မဟုတ်ဘူး။ ဒါတွေဟာ အထင်ကြီးစရာမဟုတ်ဘူး။ ရလာတုန်းခဏမှာ ငါ ဘာကိုအကျိုးရှိအောင်လုပ်မလဲဆိုပြီး အကျိုးရှိမယ့်အရာတစ်ခုခုကို စဉ်းစားဆင်ခြင်ပြီး အကျိုးရှိအောင် လုပ်သင့်တယ်။ မရလာဘူးဆိုလို့ရှိရင်လည်း မရလာတာကြီး ကို စိတ်ပျက်နေတာ အဖြေတစ်ခုမဟုတ်ဘူး။ စိတ်ပျက်နေလို့လည်း ရလာမှာမဟုတ်ဘူး။ ငါ ရနိုင်တဲ့အခြေအနေမရှိသေးလို့ မရတာ၊ ဘယ်ဘက်က ငါ့မှာချို့ယွင်းနေသလဲဆိုပြီး ကိုယ့်ချို့ယွင်းချက်ကို အဖြေရှာပြီးတော့ ရအောင် ကြိုးစားရမယ်။ ဒါ မှန်ကန်တဲ့နည်းလမ်းတစ်ခုပဲ။ #ဆရာတော်ဒေါက်တာအရှင်နန္ဒမာလာဘိဝံသ #Posted_by_Words_of_Buddha [ လောကဓံမုန်တိုင်းများနှင့် ကြံ့ခိုင်သည့်စိတ်ထား တရားတော် ]