အလင်းရောင် ဓမ္မ: 🌿 သူတော်ကောင်းကို ပေါင်းပါ 🌿 ကိုယ်က သူတော်ကောင်းနဲ့ ပေါင်းလိုက်တဲ့အလုပ်ကို လုပ်လိုက်မိဖို့ပဲ လိုတယ်။ အဲဒါဆိုရင် သူ့ဆီကနေပြီးတော့မှ သူ သိတဲ့အသိ စကားအနေနဲ့ ထွက်မလာနိုင်ဘူးလား။ ထွက်လာနိုင်တယ်။ ကြားရမယ်နော်။ ဟုတ်တယ်။ ဒါက အလွန်မှန်တယ်။ စီးပွားရေးသမားနဲ့ ပေါင်းရင် စီးပွားရေးစကား ကြားရမှာနော်။ နိူင်ငံရေးသမားနဲ့ ပေါင်းရင် နိူင်ငံရေးစကားပဲ ကြားရမှာ။ ဒါပဲလေ။ ဟုတ်တယ်မဟုတ်လား။ ဒါပဲလေ၊လူတွေက သူတို့စိတ်ထဲရှိတာ သူတို့ ပြောနေကြတာလေ။ ကိုယ်လည်းပဲ ဒီအတိုင်းပဲနော်။ အဲတော့ သူ့စိတ်ထဲမှာ ဘာတွေ ရှိလဲဆိုတာ ကိုယ် စိတ်ဝင်စားဖို့ လိုတယ်။ သူ့စိတ်ထဲမှာ မြင့်မြတ်တာတွေ ရှိတယ်ဆိုရင် အဲဒီလူက မြင့်မြတ်တဲ့စကားတွေ ထွက်လာမှာ။ အဲလိုဆိုရင် ကိုယ်က မြင့်မြတ်တာတွေ ကြားရမှာ။ ဒါကြောင့် မြတ်စွာဘုရားက သူတော်ကောင်းကို ပေါင်းပါ။ အဲဒါဆိုရင် သင်ဟာ သူတော်ကောင်းတရားကို နာရလိမ့်မယ် ကြားရလိမ့်မယ်တဲ့။ သူတော်ကောင်းတရားကို နာရပြီ၊ ကြားရပြီဆိုရင် သူဟာ သူတော်ကောင်း အကျင့်ကို ကျင့်သုံးလိမ့်မယ်တဲ့။ ဟုတ်တယ်၊ အခု ဒါယကာ ဒါယိကာမတို့ ဦးဇင်းတို့ ထိုက်သလောက် ဒီမြင့်မြတ်တဲ့ အကျင့်လေးကို ကျင့်ဖြစ်တယ်ဆိုတာ နားထောင်ထားရတဲ့ ကြားထားရတဲ့။ အဲဒီကြားမူရဲ့ အဲဒီကြားထားတာလေးတွေရဲ့ အစွမ်းပဲ တကယ်တန်းက ။ ကိုယ့်ဟာကိုယ် တစ်ချို့က သိပ်ပြီးတော့ ထင်နေကြတာ ရှိတယ်နော်။ "ငါ သဘာဝကျကျ တွေးတတ်လို့ ငါ သဘာဝကျလို့ ငါ ဒီအလုပ်ကို လုပ်ဖြစ်နေတာ"လို့ ထင်တာ ဟုတ်လား။ အဲဒီ ငါဆိုတာကြီးက သဘာဝကျကျ ဘာဖြစ်လို့ တွေးတတ်တာတုန်း။ ကြားထားလို့ တွေးတတ်တာနော်။ ကိုယ့်ခေါင်းထဲမှာ သဘာဝကျတဲ့ ဒေသနာလေးတွေ ထည့်ခဲ့ဘူးလို့၊ ကြားခဲ့ဘူးလို့၊ ဖတ်ခဲ့ဘူးလို့ အဲဒါလေးတွေကို အခြေခံပြီးတော့ အတွေးကောင်းလေးတွေ ဖြစ်ရတာ။ အဲဒီ အတွေးလေးတွေက တွန်းလို့၊ နိူးဆော်လို့ ဒီမြင့်မြတ်တဲ့ အလုပ်ကလေးကို လုပ်ဖြစ်တာ။ သူ့ဟာသူ အကြောင်းအကျိုး စပ်ဆက်ပြီးတော့ နားလည်ဖို့ လိုတယ်နော်။ သူတော်ကောင်းကို ပေါင်းမှ သူတော်ကောင်းကို ပေါင်းရင် သူတော်ကောင်းတရားကို သင် နာရပါလိမ့်မယ်တဲ့။ သူတော်ကောင်းတရားကို နာရလို့ရှိရင် သင်ဟာ သူတော်ကောင်း အကျင့်ကို ကျင့်ရပါလိမ့်မယ်တဲ့။ မှန်ကန်တဲ့အတွေးကို ပရိသတ်တို့က ကြားထဲမှာ ဖြည့်ပြီးတော့ နားလည်တတ်ဖို့ လိုတယ် ဟုတ်လား။ မှန်ကန်တဲ့စကားကို ကြားရမှ မှန်ကန်တဲ့ အတွေးတွေ တွေးဖြစ်မှာ။ ဆုံးဖြတ်ချက်လေးတွေက ချတာလေးတွေ မှန်မှ။ ဒါကြောင့် ပရိသတ်အပေါင်းသူတော်ကောင်းတို့ ကိုယ်တွေးသလို ကိုယ်ဆုံးဖြတ်သလို လူတွေဟာ လုပ်နေကြတာ။ အဲတော့ ကိုယ်တွေးတာ၊ ကိုယ်ဆုံးဖြတ်တာ ဘာတွေကို အခြေခံပြီးတော့၊ဘာတွေကို အခြေခံပြီးတော့ တွေးတာလဲ၊ ဘယ်အတွေးတွေကို အခြေခံပြီးတော့ ဆုံးဖြတ်တာလဲ။ သူတော်ကောင်းတရားကို ကြားခဲ့နာခဲ့ရတဲ့ ဒီအတွေ့အကြုံ ဟုတ်လား။ ဒီကြားမူတွေကို အခြေခံပြီးတော့ပဲ တွေးကြရတာ။ ဒီအတွေးတွေကို အခြေခံပြီးတော့ပဲ ဆုံးဖြတ်ကြရတာ။ အဲဒီဆုံးဖြတ်ချက်တွေအတိုင်း ဒါယကာ ဒါယိကာမတို့ ဦးဇင်းတို့တစ်တွေက လှုပ်ရှားနေကြတာပေါ့နော်။ အဲတော့ ကိုယ် လှုပ်ရှားတဲ့အတိုင်း ရောက်သွားမှာပဲ။ ကိုယ် လုပ်တဲ့အတိုင်း ဖြစ်မှာပဲ။ 🌷🌷🌷သစ္စာရွှေစည်ဆရာတော်🌷🌷🌷 မာဂဏ္ဍီသုတ္တန်တရားတော်မှ ကောက်နုတ်ချက် ဖြစ်ပါသည်။ 🌩️🌩️🌩️🌩️🌩️🌩️🌩️🌩️🌩️🌩️🌩️🌩️🌩️🌩️🌩️🌩️