အလင်းရောင် ဓမ္မ: "ဇောခုနစ်ကြိမ် အကျိုးပေးပုံ ကပ်ကျော်တရားတော်" (ကျေးဇူးတော်ရှင် မိုးကုတ်ဆရာတော်ကြီး) အားလုံးသော ဒကာ,ဒကာမတွေ မိမိတို့၏ ဝိပဿနာအလုပ်လုပ်ဖို့ရာ ဘုန်းကြီးများကလည်း တိုက်တွန်းတယ်။ ပစ္စုပ္ပန် သံသရာနှစ်ဖြာအကျိုးကို များစေနိုင်တယ်လို့ မှတ်ရမယ်။ အဲတော့ကို ဝိပဿနာတစ်ခါရှုလျင် ဒီဘက် ကနေပြီး ဒကာ, ဒကာမတွေက ကိုယ့်စိတ်ကလေး တစ်ခုထားတာပေါ့, လောဘစိတ်ဖြစ်ဖြစ်, ဒေါသစိတ် ဖြစ်ဖြစ်, မောဟစိတ်ဖြစ်ဖြစ်, ဝိစိကိစ္ဆာစိတ်ဖြစ်ဖြစ်, ပျံ့လွင်တဲ့စိတ်ဖြစ်ဖြစ်ထားတာပေါ့။ ဦးလှဘူးတို့, ဒကာသိုက်တို့နော် .....(မှန်လှပါဘုရား)။ ဒါလေးဟာ ဖြစ်ပြီးပျက်တာပဲလို့ဆိုတာသည် မဂ္ဂင်က သိတာပဲ, မဂ္ဂင်ကသိတော့ ဘယ်နှစ်ခါသိသတုန်းဆိုတာ ဒကာသိုက်တို့ ဦးလှဘူးတို့က မေးဖို့လိုတယ်။ မဂ္ဂင်ကဘယ်နှစ်ခါသိတုန်းလို့ မေးလို့ရှိရင်ဖြင့် ပထမ တစ်နံပါတ် တစ်ခါသိတယ်။ သိပြီး တစ်နံပါတ် စိတ်ကလေး ချုပ်တာပဲ.....(မှန်လှပါဘုရား) ။ နောက် နှစ်နံပါတ်နဲ့ သိပြန်တယ် (မှန်လှပါဘုရား)။ ကောင်းပြီ ဒါဖြင့် နောက်ခုနစ်နံပါတ်နဲ့ သိပြန်တယ်။ ဒါဖြင့် ခုနစ်ခါသိတာပေါ့။ ခုနစ်ခါသိတယ်လို့ မှတ်ကြရမယ်။ အဲဒီတော့ ဒကာဒကာမတွေ ဖြစ်ပျက်ကို တစ်ခါ ရှုလိုက်လို့ရှိရင် သိတဲ့စိတ် ခုနစ်ကြိမ်ဖြစ်တယ်လို့မှတ်ပါ။ သိတဲ့စိတ် ဘယ်နှစ်ကြိမ်ပါလိမ့် ...(ခုနှစ်ကြိမ်ပါဘုရား)။ ခုနစ်ကြိမ်ဖြစ်တယ်လို့မှတ်ထားရမယ်။ ဒါဖြင့် ကျုပ်တို့ ဘယ်စိတ်ရှုရှု ဇောခုနစ်ကြိမ်ဖြစ်တယ်လို့ ဦးလှဘူးတို့ ဒကာသိုက်တို့ မှတ်ရလိမ့်မယ်... (မှန်လှပါဘုရား)။ ဘယ်အခါရှုရှု ဘယ်နှစ်ကြိမ်ဖြစ်ပါလိမ့်... (ခုနစ်ကြိမ် ဖြစ်ပါတယ်ဘုရား)။ ခုနစ်ကြိမ်ဖြစ်တယ်ဆိုတာ မှတ်ထားပါ။ သဘောကျပလား ...(ကျပါတယ်ဘုရား) ကောင်းပြီ ဒါဖြင့် သြော် ... ဒို့ ဝိပဿနာရှုတဲ့အခါကျတော့ ဝိပဿနာ မဂ်ဇောဟာ ခုနစ်ခါတောင်ဖြစ်ပါကလားလို့ ကိုယ့်စိတ်ထဲက မှတ်ထားရမယ် ... (မှန်လှပါဘုရား) တစ်ခါရှုရင် ဘယ်နှစ်ခါ ဖြစ်သတုန်း ...( ခုနစ် ခ ါဖြစ်ပါတယ်ဘုရား)။ အဲဒီတော့ ခုနစ်ခါဖြစ်တာကို ဒကာဒကာမတွေက သိထားတော့မှ ... သြော် ဒို့ တစ်ခါ ဖြစ်ပျက်ကလေး တစ်ခါရှုလိုက်ရင် ဇောခုနစ်ကြိမ် တောင် ဖြစ်တယ်ဆိုတဲ့ဥစ္စာကို ဒကာဒကာမတွေက မှတ်ထားရမယ် ... (မှန်လှပါဘုရား)။ အကျိုးပေးကို ရှင်းပြမယ် ... (မှန်လှပါဘုရား)။ ပထမ ဒီစိတ်ကလေး ဒီထဲမှာလဲ မဂ္ဂင်ငါးပါးပါတာပဲ ... (မှန်လှပါဘုရား) စေတနာလည်းပါတာပဲ ... (မှန်လှပါဘုရား) မဂ္ဂင်ငါးပါးလည်းပါတယ် , စေတနာတွေလည်း ပါတယ် , ဒီထဲမှာပါတဲ့ စေတနာက ဒီဘဝအကျိုးပေးရမယ်လို့မှတ်ပါ ... (မှန်လှပါဘုရား) သဘောကျပလား ... ကျပါပြီဘုရား။ ဒီဘဝ အကျိုး ပေးရမယ်လို့ ဒကာဒကာမတွေ မှတ်ထားစမ်းပါ။ ဒီဘဝ ဘယ်အချိန်ကစ အကျိုးပေးမှာတုန်းလို့ မေးလို့ရှိရင်ဖြင့် ခုချိန်ကစပြီး ခုနစ်ရက်အတွင်း သို့မဟုတ်ရင် ခုနစ်လအတွင်း သို့မဟုတ်လို့ရှိရင် ခုနစ်နှစ်အတွင်း ... (မှန်လှပါဘုရား) ဒီထဲပါတဲ့ မဂ္ဂင်ကအကျိုးပေးမယ်။ မဂ္ဂင်ဆိုသောကြောင့် ကောင်းကျိုးသာပေးလိမ့်မယ်လို့ ဒကာဒကာမတွေ ကမှတ်ထားပါ ... (မှန်လှပါဘုရား)။ ဒါဖြင့် ဒီအလုပ်သည် လျင်လျင်မြန်မြန်အကျိုးပေး တဲ့ အလုပ်ပေါ့ဗျာ ... (မှန်လှပါဘုရား) ရှင်းကြပလား။ ဒါဖြင့် ဒိဌဓမ္မအကျိုးပေးတာ ပထမဇောပဲ , ဝိပဿနာရှုတဲ့ ပထမဇောဟာ ဒိဌဓမ္မအကျိုးပေး တယ်လို့ ဒကာဒကာမတွေကမှတ်ထားပါ။ အဲ ဒိဌဓမ္မ ဆိုတာ ဘယ်လိုပါလိမ့်မတုန်းဆိုတော့ ယခုရှုတဲ့အချိန် ကစပြီး ခုနစ်ရက်အတွင်း ဒီအကျိုးမပေးသေးလျင် ခုနစ်လအတွင်း ... ဒီခုနစ်လမှအကျိုးမပေးသေးလျင် ... (ခုနစ်နှစ်အတွင်းပါဘုရား)။ အဲဒါ သူ့စွမ်းရည်သတ္တိရှိတယ် ... (မှန်လှပါဘုရား) ပထမဇောထဲပါတဲ့ မဂ္ဂင်၏အကျိုးပေးပုံကို ကန့်သတ် လိုက်တဲ့ရက် သဘောကျပလား ... (သဘောကျပါတယ်ဘုရား)။ ဒါကြောင့် ဒီဒကာဒကာမတွေ ဖြစ်ပျက်ရှုပါ ရှုပါ ဆိုတဲ့ဥစ္စာ ဒီပထမဇောများများပေါ်အောင်လို့ခိုင်းတာ ... (မှန်လှပါဘုရား)။ ဒီပထမဇောများများပေါ်အောင် ခိုင်းနေတယ်လို့ ဦးလှဘူးမှတ်ရမယ် ... (မှန်လှပါဘုရား)။ ဒါဖြင့် ဒီပထမဇောကို ဆရာဘုန်းကြီးက ဘယ်နှယ့်ကြောင့် ပေါ်စေချင်ပါလိမ့်မလဲလို့မေးတော့ ဒီပထမဇောက ဝိပဿနာပထမဇောလဲဖြစ် ကုသိုလ် တကာ ကုသိုလ်ထဲမှာလည်း အမြတ်ဆုံး ပထမဇောလဲ ဖြစ်တယ် , ဒါနကုသိုလ် ပထမဇောထက်လဲ သူက မြတ်တယ် , သီလကုသိုလ်ပထမဇောထက်ကော (သူကမြတ်ပါတယ်ဘုရား) , သမထကုသိုလ် ပထမဇောထက်ကော (သူကမြတ်ပါတယ်ဘုရား)။ ကောင်းပြီ ဒါဖြင့် ဝိပဿနာပထမဇောက မြတ်တယ်လို့ ဆိုတာသိတော့ အကျိုးပေးက သူအသာဆုံးပေါ့ဗျာ ... (မှန်လှပါဘုရား) , သဘောပါကြလား ... ဒါဖြင့် ဝိပဿနာ ကြပ်ကြပ်ရှုကြ , ကြပ်ကြပ်ရှုကြ ဆိုတော့ ဒီဇောဟာ အရင်ဆုံးပေါ်တဲ့ဇောပဲ ဖြစ်ပျက် အရင်ဆုံးမြင်တဲ့ဇောပဲ ... သဘောကျပလား (ကျပါတယ်ဘုရား)။ အဲဒီတော့ကို အကျိုးပေးရာကာလဆိုတော့ ပထမဇောက ဒကာဒကာမတွေကို အကြောင်း တိုက်ဆိုင်လို့ ကပ်တွေ အန္တရာယ်တွေ တွေ့မယ်ကြံ အုံးတော့ သူကအကျိုးပေးပြစ်လိုက်တယ် ... (မှန်လှပါဘုရား)။ သူကပထမဇောက အကျိုးပေးနေ တော့ ကောင်းကျိုးပေးနေတော့ ဟိုဟာတွေက မလာနိုင်တော့ဘူး ... (မှန်လှပါဘုရား) သဘောကျပြီလား ... (ကျပါပြီဘုရား)။ ဒါဖြင့် ပထမဇောသည် ဒကာဒကာမတွေအား ပစ္စုပ္ပန်အကြောင်းတိုက်ဆိုင်လို့ ပေါ်လာမဲ့ကပ်မျိုးကိုလဲ ပထမဇောကအကျိုးပေးလိုက်တဲ့အတွက် ကာကွယ်ရေး ရတယ် ... မှန်လှပါဘုရား (သဘောကျပြီလား) (ကျပါပြီဘုရား)။ ဒါဖြင့် ပထမဇောလုပ်ထိုက် မလုပ်ထိုက် ... (လုပ်ထိုက်ပါတယ်ဘုရား)။ ပထမဇောကိုဖြင့် ကြိုးစားပြီးဂရုစိုက်ပါ။ ပထမဇောလာလို့ရှိရင်လဲ အလယ်ဇောငါးခုရော (လာမှာပါဘုရား) လာမှာပဲ။ မလာပါနဲ့ဆိုလို့ရော ရရဲ့လား .. (မရပါဘုရား)။ သို့သော်လဲ အလယ်ဇော ငါးခုကတော့ နောက်မှအကျိုးပေးမယ်။ သတ္တမဇော ကတော့ ကံထိုက်တဲ့အတွက် ဒုတိယဘဝ အကျိုးပေး မယ် , အလယ်ဇောငါးချက်ကတော့ တတိယဘဝမှစ၍ နိဗ္ဗာန်ရသည့်ဘဝတိုင်အောင် သူအကျိုးပေးမယ် ... (မှန်လှပါဘုရား)။ ကိုင်း ., ပထမဇောကလည်း ယခုဘဝ , ဟောဒီ သတ္တမဇောက ဒုတိယဘဝ အကျိုးပေးတယ်။ အလယ်ဇောက တတိယမှစ၍ နိဗ္ဗာန်မရမချင်း လူသွားရာအရိပ်ပါနေတယ်လို့မှတ်ပါ ... (မှန်လှပါဘုရား)။ ဒါဖြင့် ဝိပဿနာ တစ်ခါရှုလိုက်တယ်ဆိုရင် ခုနစ်ကြိမ်ဖြစ်တော့ ကျေးဇူးမများတာရယ်လို့ ပါသေးသလား (မပါပါဘုရား)။ ဒီဘဝအတွက်က ပထမဇော (မှန်လှပါဘုရား)။ နောက်ဘဝအတွက်က ဒီသတ္တမဇော , နောက်ဘဝ အတွက်က (သတ္တမဇောပါဘုရား)။ အလယ်ဇော ငါးချက်က တတိယဘဝကစ၍ နိဗ္ဗာန်ရသည့် ဘဝတိုင်အောင် သူတို့ အကျိုးပေးလိမ့်မယ် .. ရှင်းပြီလား။ ကျေးဇူးတော်ရှင် မိုးကုတ်ဆရာတော်ကြီး ဟောကြား ဆုံးမတော်မူသော "ဇောခုနစ်ကြိမ်အကျိုးပေးပုံ ကပ်ကျော်တရားတော်"စာအုပ်မှ ကူးယူ ထုတ်နုတ်ပူဇော်ပါသည်။ အပြည့်အစုံကို အောက်ပါ link တွင်ဖတ်ရှုနိုင်ပါသည်။ downlod link - https://ift.tt/35L8eBO #credit