အလင်းရောင် ဓမ္မ: #တစ်သံသရာလုံးငြိမ်းအေးစေသော *********************************** အသိဉာဏ်ဖြင့်နေနိုင်အောင်ကြိုးစားကြပါ။ ***************************************** လူတစ်ဦးတစ်ယောက်၏ စိတ်ကို အကဲခတ်ရတာ သိပ်ခက်တယ်။ တခါတရံ လူတွေဟာ အကွေ့အကောက် သိပ်များနေတော့ မိမိစိတ်နဲ့ နှိုင်းချိန်လို့ ဘယ်လိုမှ မဖြစ်နိုင်ဘူး။ မိမိစိတ်ကိုသာ အကဲခတ်ရတာ ကောင်းတယ်။ ဆုံးမရခက်တဲ့ ဒီစိတ်ကို သတိပဋ္ဌာန် တရားကို လက်ကိုင်ထားပြီး စောင့်ကြည့်ပါမှ ရှေ့စိတ်ချုပ်ပျောက် နောက်စိတ် အစားထိုး ရောက်ရောက်နေတာကို သိသိနေမှ ဒါ… အကုသိုလ်စိတ် ဒါ…ကုသိုလ်စိတ်လို့ သိနေတယ်။ ဒီလို ကွဲပြား ခြားနားစွာ မြင်နိုင်သူသာ ဘုရားအဆုံးအမနှင့် နေသောသူဟု ဆိုထိုက်တယ်။ သင်သည် ဘုရားအဆုံးအမဖြင့် နေသူဖြစ်ပါစေ။ စိတ်ကို အမြဲဆုံးမထားပါ။ ဘဝတစ်ခုရလာတဲ့အခါ ကုသိုလ်အသိ ကင်းဝေးနေသူနဲ့ ကုသိုလ်အသိ ပြည့်ဝထား သူသည် ခြားနားမှု အများကြီးကွာတယ်။ စိတ်ထားကွာတယ်။ ခွင့်လွှတ်မှု ကွာတယ်။ သည်းခံခြင်း ကွာတယ်။ အပြောအဆို အနေအထိုင် ဆက်ဆံခြင်း ကွာတယ်။ ကုသိုလ် အသိများလာသူဟာ အရာရာတိုင်းမှာ စိတ်ထားဖြူစင်ပြီး အကုသိုလ်ဖြစ်မည်ဆိုပါက ချက်ခြင်းအသိက ရှေ့က ဆောင်ပြီး ကုသိုလ်ဖြစ်မည့် အာရုံသို့ စိတ်ကို ပြောင်းလွှဲပစ်လိုက်တယ်။ အကုသိုလ်များများ ဖြစ်ခွင့်မပေးဘူး။ ခန္ဓာ၏ ဖြစ်စဉ်တွေကို သတိထားထားပြီး ကြည့်တိုင်း ကြည့်တိုင်း ဘယ်စိတ်ပေါ်ပေါ် အသိကပ်လိုက်တိုင်း … ဘာဆိုဘာမှ မရှိပါလားဟု ဉာဏ်ကလေးက ကပ်ကပ်သိနေလေတော့ စိတ်ဟာ သုည ဆိုက်နေတော့တာပေါ့။ မိမိပတ်ဝန်းကျင်တစ်ခုလုံးကို ဉာဏ်မျက်လုံးနဲ့ ဝှေ့ရမ်းပြီး ကြည့်နေမိသောအခါတိုင်း လူတွေရဲ့စိတ်တွေဟာ လောဘ ဒေါသ မောဟ စသော အကုသိုလ်စိတ်ရိုင်းတွေ ပြည့်ကြပ်ပြီး မေတ္တာတရားတွေ ခေါင်းပါးနေကြတယ်။ အမှန်တရားတွေကို လေ့လာမှု စုံစမ်းမှု ကျင့်သုံးမှု နည်းပါးပြီး နူးညံ့သိမ်မွေ့သော အရာဝတ္ထုတွေက အလွန်နည်းပြီး … ကိုယ်ကြမ်း စိတ်ကြမ်း နှုတ်ကြမ်းတမ်းနေကြပြီး တစ်ဦးအပေါ်တစ်ဦး သည်းခံခွင့်လွတ်မှုတွေ ကုန်ဆုံးနေကြပါလားဟုသာ တွေ့မြင်နေရပါ သည်။ ဘဝတစ်သက်တာမှာ အကောင်းဆုံး သမိုင်းတွေ ရှိနေဖို့ လိုတယ်။ သူတစ်ပါးအကြောင်းတွေကို ဝေဖန်နေ မည့်အစား မိမိကိုယ်ကိုသာ ဝေဖန်ပါ။ ငါ့မှာ မဂ်ဖိုလ် နိဗ္ဗာန်ရောက်စေနိုင်သော ကုသိုလ်စိတ်တွေ ဘယ်လောက်ပြည့်စုံလာပြီလဲ။ တစ်နေ့ကုန်တိုင်း ညအိပ်ရာဝင် နဖူးလက်တင်ပြီး စစ်ဆေးပါ။ ဒီသံသရာမှ လွတ်မြောက်စေတတ်သော ကုသိုလ်တွေ ဘယ်လောက်ထိ ပြီးပြည့်စုံ လာပြီလဲ။ မိမိကိုယ်ကို မိမိဝေဖန်ပါ။ စစ်ဆေးပါ။ သူတပါးအပြစ်ကို မတွေးပါနဲ့။ မကြံပါနဲ့။ ကိုယ့်အကြောင်းကို သိပါ။ သူတစ်ပါးအကြောင်းကို သိလို့ ဘာမှမထူး ဘူးလေ။ ကိုယ့်ဘဝ အကြောင်းကိုသာ ကိုယ်သိနေပါစေ။ ကိုယ့်ခန္ဓာ ကိုယ်ကြည့်ရင် ဒုက္ခသစ္စာမှ မဂ္ဂသစ္စာသို့ … သူတပါးခန္ဓာကို ကြည့်ရင် ဒုက္ခသစ္စာမှ သမုဒယသစ္စာ … ဖြစ်တယ်ဆိုတာ အသိ သတိရှိနေပါစေ။ မိမိတို့ရရှိထားတဲ့ဘဝလေးကို တည်တည်ငြိမ်ငြိမ် အေးအေးချမ်းချမ်းနဲ့ ခန္ဓာကိုယ်၏ ဖြစ်စဉ်ခိုက်ကလေးတွေကို အသိကလေးကပ်ပြီး စောင့်ကြည့်နေတဲ့ အချိန်တိုင်းမှာ … ကိလေသာကင်းဝေးပြီး မြူတိမ်ကင်းတဲ့ လပြည့်ညလို စိတ်မှာ အကုသိုလ်ကံသတ္တိတွေ ကင်းဝေးနေ သူ၏ ရရှိထားသောဘဝသည် အပြစ်အနာဆာ ကင်းရှင်းနေရလို့ သိပ်ကိုချမ်းသာတယ်။ ကိလေသာမရှိသော စိတ်တွေ များလေလေ တည်ငြိမ်သော ဉာဏ်သတ္တိက ဘုရားအစ ရှိသော အရိယာတို့ သိသော အသိနဲ့နေမယ်ဆိုရင် လူဘဝ ခေတ္တခဏ အလည်လာရကျိုးနပ်ပြီပေါ့။ ဘာမှမဟုတ်တဲ့ တစ်ဘဝ တစ်နပ်စာကို မစဉ်းမစားပါပဲ … တစ်သံသရာလုံး ငြိမ်းအေးသော အသိဉာဏ်ဖြင့် နေနိုင်အောင် ကြိုးစားထားနိုင်ပါစေဟု ဆန္ဒပြုလျက်။ 🙏🙏🙏 {မြောက်ဦးဆရာတော်ဘုရားကြီး} (အဂ္ဂမဟာကမ္မဌာနာစရိယဘဒ္ဒန္တအရှင်ဝါယာမိန္ဒ) #Via