အလင်းရောင် ဓမ္မ: လူ့ဘ၀မှာ ကျေနပ်စရာများ 💍💎💍💎💍💎💍💎 ❖ ဘ၀မှာ မကျေနပ်စရာတွေကိုလည်း ရှာဖွေတွေ့ဖို့လိုအပ်တယ်၊ ကျေနပ်စရာတွေကိုလည်း ရှာဖွေတွေ့ဖို့လိုအပ်တယ်။ ❖ မကျေနပ်စရာကောင်းတဲ့ ဘ၀မှာ လူဖြစ်လာကြရပြီး ကျေနပ်စရာကောင်းတဲ့ အချက်အလက်တွေ ဒို့မှာဘာတွေလိုအပ်လဲဆိုတာ အလေးအနက် ဆင်ခြင်စဉ်းစားပြီးတော့ ကိုယ့်ဘ၀ ပြုပြင်ကြရမှာဖြစ်တယ်။ ❖ မြတ်ဗုဒ္ဓ၏ အဆုံးအမတွေကို အလွယ်တကူသိခွင့်ရပါရဲ့သားနဲ့ မြတ်စွာဘုရားရဲ့ အဆုံးအမတွေကို အလေးအနက်ထားပြီးတော့ နာယူရမှန်း၊ မှတ်သားရမှန်း၊ လေ့လာရမှန်း၊ ဆည်းပူရမှန်း မသိဘူး။ ❖ သိတောင်မှပဲ တခြားကိစ္စတွေနဲ့ လူတွေဟာ အချိန်ကုန်ပြီးတော့ ကိုယ့်ဘ၀မှာ တန်ဖိုးဆိုတာ ဘာလဲဆိုတာ ဆင်ခြင်စဉ်းစားမှုမပြုခဲ့လို့ အချိန်ကုန်သွားပြီးဆိုတော့မှ သြော် ဒို့ဟာ ဆုံးရှုံးသွားပြီဆိုတာ အဲဒီကျမှတော့ ဘာတတ်နိုင်မလဲ ဘာမှမတတ်နိုင်တော့ဘူး။ ❖ ကျေနပ်စရာတွေ ဘာတုန်းဆိုရင် ကျင့်သုံးရမယ့် သိက္ခာပုဒ်(၅)မျိုး ငါးပါးသီလကို လေးလေးနက်နက်ကျင့်သုံးရမယ်။ ငါးပါးသီလလုံရင် သိပ်ကျေနပ်စရာကောင်းတယ်။ လူ့ဘဝကြီးဟာ အိုရင်အိုပစေ ငါးပါးသီလလုံရင် သိပ်ကျေနပ်စရာကောင်းတယ်။ အရိယာသူတော်စင် ဖြစ်မှ ငါးပါးသီလဆိုတာ လုံခြုံနိုင်တယ်။ ❖ မွန်မြတ်တဲ့ စိတ်နေသဘောထား အလွန့်ကို အထက်တန်းကျတဲ့ စိတ်နေသဘောထားတွေရှိတယ်၊ မျက်မှောက်ဘ၀မှာ အဲဒီစိတ်ဓာတ်မျိုးလေးထားနိုင်လို့ရှိရင် ချမ်းသာတယ်တဲ့၊ နေရတာ ကျေနပ်စရာကောင်းတယ်၊ တွေးနေရင်ကို ချမ်းသာတယ်၊ စိတ်ဆင်းရဲစရာမရှိဘူး။ ☆ ဒီလို မွန်မြတ်တဲ့စိတ်နဲ့ လုပ်ဆောင်ရတဲ့ တွေးနေတဲ့အချိန်မှာ စိတ်နှလုံး ကြည်နူးဖွယ်ရာ ကောင်းတဲ့ ချမ်းသာစွာနေရတဲ့ အချက်လေးချက်နဲ့ လည်း ပြည့်ပြည့်စုံစုံ အလိုရှိတိုင်း ရရှိနေတယ်ဆိုလို့ ရှိရင် အဲဒီလူဘ၀ဟာ ကျေနပ်စရာအကောင်းဆုံးပဲ။ 🔸 ငါးပါးသီလနဲ့ ကိုယ်လုပ်သမျှတွေ လုံခြုံခြင်း၊ 🔸 စိတ်ရဲ့ကြည်နူးဖွယ်ရာ ကောင်းမြတ်တဲ့စိတ်နဲ့ မျက်မှောက်ဘ၀မှာ စိတ်ချမ်းသာ၊ ကိုယ်ချမ်းသာ လက်ချမ်းသာနဲ့ နေနိုင်တဲ့ အခြေအနေလေးရပ်နဲ့ပြည့်စုံခြင်း၊ အဲဒါဟာ ဘ၀မှာ ကျေနပ်စရာ အကောင်းဆုံးအချက်တွေလို့ မြတ်စွာဘုရား ဒီလိုဟောတာ။ ❖ ငါးပါးသီလကို သေသေချာ ထိန်းသိမ်းစောင့်ရှောက်တယ်ဆိုတဲ့ အချက်ရယ်၊ စိတ်ချမ်းသာ ကိုယ်ချမ်းသာမူကို ပေးနိုင်တဲ့ မွန်မြတ်တဲ့ စိတ်နေစိတ်ထားတွေနဲ့ နေနိုင်တယ်ဆိုတဲ့ အချက်လေးချက်ရယ် ပေါင်းလိုက်တော့ (၅)ခု အဲဒီ (၅)ခုနဲ့ပြည့်စုံနေတဲ့ လူ့ဘ၀ဟာ ကျေနပ်စရာအကောင်းဆုံး လူဘ၀။ ❖ အဲဒီ အချက်(၅)ချက်နဲ့ ပြည့်စုံပြီဆိုလို့ရှိရင် ဒီလူဟာ ကိုယ့်ကိုကိုယ်ပြောနိုင်တယ်၊ 🔸 ငါတို့က ငရဲဘယ်တော့မှမရောက်ဘူး 🔸 ငါတို့ဘယ်တော့မှ တိရစ္ဆာန်မဖြစ်ဘူး၊ 🔸 ငါတို့ ဘယ်တော့မှ ပြိတ္တာဘ၀မရောက်ဘူး 🔸 ငါဟာအပါယ်လေးဘုံလွတ်တယ် 🔸 ငါ့အဖို့အပါယ်တံခါးပိတ်ပြီ 🔸 ငါဟာသောတာပန်နဲ့တူတယ် သောတာပန်ဖြစ်နေပြီ လို့ ကိုယ့်ကိုကိုယ် ပြောချင်ရင်ပြောလို့ရတယ်လို့ မြတ်စွာဘုရားက ဒီလိုဟောတာ။ ❖ မြင့်မြတ်တဲ့စိတ်နဲ့ စိတ်ကိုကြည်နူးအောင်၊ မသန့်စင်သေးတဲ့စိတ် မစင်ကြယ်သေးတဲ့စိတ်တွေ စင်ကြယ်လာစေတဲ့အင်္ဂါရပ်တွေ ဒါတွေကိုပဲ ကိုယ့်သန္တာန်မှာ ကြိုးစားပြီး လုပ်ဆောင်ရမှာဖြစ်တယ်။ ❖ ဒုက္ခရောက်တိုင်း ဒုက္ခရောက်တိုင်း ဘုရားကို အာရုံပြုကြည့်လိုက်၊ ဒီဒုက္ခတွေကြောင့် ဒီဒုက္ခတွေဖြစ်မှာမို့ မြတ်စွာဘုရားက ကြိုတင်ပြီး ပြောထားပြီးသားပဲ 🔸 "သဗ္ဗေသင်္ခါရာ အနိစ္စာ" ဘ၀ဆိုတာ ဘယ်ဟာမှ မမြဲဘူး။ သင်္ခါရတွေဆိုတာ ဖြစ်ပြီးရင် ပြတ်တာပဲ၊ 🔸 "သဗ္ဗေသင်္ခါရာ ဒုက္ခာ" သင်္ခါရတွေဆိုတာ ဒုက္ခတွေပဲ၊ 🔸 "သဗ္ဗေသင်္ခါရာ အနတ္တာ" "သဗ္ဗေဓမ္မာ အနတ္တာ" သဘာ၀တရားတွေမှန်သမျှ ကိုယ်ပိုင်တဲ့အရာတွေ မဟုတ်ဘူး၊ ကိုယ်ဖြစ်ချင်တိုင်း ဖြစ်လို့တခုမှမရဘူး။ အဲဒီတော့ ငါဘဝြဖစ်တာ ငါဖြစ်တာမဟုတ်ဘူး။ ❖ သင်္ခါရသဘောတရား သူ့ဘာသာဖြစ်တာ မြတ်စွာဘုရားက ဒါကိုဟောတာ မှန်လိုက်တာ ကြည့်စမ်းပ မြတ်စွာဘုရားရဲ့ဂုဏ်ကို အာရုံပြုတာ မှန်လိုက်တာလို့ဆိုပြီး မြတ်စွာဘုရားရဲ့ ဂုဏ်ကို အာရုံပြုပြီး အော် မြတ်စွာဘုရား ဒါတွေ့မြင်လို့ ဒို့ကိုဆုံးမတာပဲ ဒီဘက်ကို အာရုံရောက်သွားရင် စိတ်ဟာကြည်နူးမူတွေရသွားတယ်။ ❖ ဒုက္ခတွေသက်သာသွားတယ်၊ ဒေါသတွေထွက်လာလို့ရှိရင် မြတ်စွာဘုရားက ဒီလိုဒေါသမျိုး မထားရဘူးလို့ဟောတာ ငါဒီလို ဒေါသမျိုးထားနေလို့ရှိရင် အပါယ်ငရဲကျမှာပဲ ကြည့်စမ်း ဒီဒေါသဟာ အပါယ်ငရဲဆိုတာ နောက်မှ အခုတင်ပဲ ငါခံနေရပြီ ဒီလိုစဉ်စားလိုက်ရင် ဘုရားရဲ့ ဂုဏ်တွေကို စဉ်းစားပြီးသားဖြစ်သွားတယ်။ 💐ဘုရားဂုဏ် ❖ မြတ်စွာဘုရားမှာ ငါမှာဖြစ်တဲ့ ဒေါသမျိုးမဖြစ်ဘူး၊ လောဘတွေ ဖြစ်နေလို့ရှိရင်လည်း ငါမှာဖြစ်တဲ့ လောဘမျိုး မြတ်စွာဘုရားမှာမရှိဘူး၊ မောဟတွေ ဖြစ်နေလို့ရှိရင်လည်း ငါမှာဖြစ်တဲ့ မောဟမျိုး မြတ်စွာဘုရားမှာမရှိဘူး၊ ဒါကြောင့်မို့ မြတ်စွာဘုရားဟာ အရဟံ ကိလေသာတရားတွေ အားလုံးဖယ်ရှားပြီးသားဖြစ်တယ် တကယ့်ကို စစ်မှန်ပါတယ်လို့ ဘုရားကိုအာရုံပြုပြီးတော့ ကြည်နူး၀မ်းသာတဲ့ စိတ်လေးနဲ့နေလိုက်ရင် အခက်အခဲတွေ အားလုံးဟာ လွန်မြှောက်သွားနိုင်တယ်။ 💐 တရားဂုဏ် ❖ မြတ်စွာဘုရားဟောတဲ့တရားဟာ အခုလိုဒုက္ခတွေ ဒီလိုအခက်အခဲတွေ လွန်မြောက်စေနိုင်တာဟာ တရားပဲ၊ ဒါကြောင့်မို့ တရားမှတပါး ငါ့မှာ အားကိုးစရာမရှိ၊ ငါဒေါသထွက်နေရင် ဒေါသငြိမ်းအောင် မေတ္တာပွားရမယ်လို့ ဟောထားတယ်၊ မေတ္တာပွားလိုက်တာနဲ့ ဒေါသဟာငြိမ်းအေးသွားတယ် မှန်လိုက်တာဆိုပြီး တရားပေါ်မှာလက်တွေ့ခံစားရတာ၊ ကျေနပ်တဲ့စိတ်နေသဘောထားတွေ ဖြစ်ပေါ်လာတယ်။ အခက်အခဲတခုကို ရှောင်လိုက်တာ။ 💐 သံဃာ့ဂုဏ် ❖ သံဃာတွေကိုအာရုံပြုပြီးတော့ နုလုံးသွင်းဆင်ခြင်လိုက်မယ်၊ ငါတို့ဟာ ကုသိုလ်ကောင်းမူလုပ်ချင်တာ ဒီသံဃာတွေမရှိရင် ငါတို့ကုသိုလ်လုပ်လို့မရဘူး လောကမှာကိုယ်ကျင့်သီလမရှိတဲ့ သူတောင်းစားပဲ ပေးစရာရှိမယ် ခွေးတွေပဲကျွေးစရာရှိမယ်၊ ခုလို မွန်မွန်မြတ်မြတ်နေတဲ့ သံဃာတွေရှိသည့်အတွက်ကြောင့် ဒို့တတွေဟာ ဒို့ပစ္စည်းတွေ လှူရတန်းရကျိုးနပ်ပြီး ဒီကုသိုလ်ကောင်းမူဟာ ဒို့အတွက်တုန့်ပြန်မူကြီးမားတဲ့ အကျိုးတရားတွေရမှာပဲလို့ သံဃာဂုဏ်ကို အာရုံပြုပြီးတော့ ဆင်ခြင်သုံးသပ်လိုက်လို့ရှိရင် လူဟာစိတ်ကြည်နူးတွေရလာတယ်။ အကုန်လုံးမေ့သွားပြီး စိတ်ထဲမှာ ကျေနပ်လာတယ်။ ❖ ကိုယ့်သီလကို ကိုယ်ဆင်ခြင်တာ.. တကယ့်ကို အသက်ထက်တန်ဖိုးထားပြီးတော့ စောင့်ရှောက်တဲ့သီလ အဲဒီသီလကိုလည်း လုံး၀ကျူးလွန်မူမရှိဘဲနဲ့ အသက်ထက်တန်းဖိုထားပြီး ထိန်းသိမ်းစောင့်ရှောက်တယ်။ ကိုယ့်သီလလေးကို တွေးနေလိုက်တဲ့အခါမှာ ကျေနပ်စရာ အားရစရာတွေ ဖြစ်ပေါ်လာတယ်။ ❖ ဘ၀မှာ ကျေနပ်စရာတွေဆိုတာ တခြားဟာတွေကို ပြောတာမဟုတ်ဘူး 🔸 ငါးပါးသီလရှိရင်လည်း ကျေနပ်စရာကောင်းတယ်၊ 🔸 ဘုရားဂုဏ်ကို အာရုံပြုပြီးတော့ ကြည်နူးမူရတာလည်း ကျေနပ်စရာကောင်းတယ်၊ 🔸တရားဂုဏ်ကို အာရုံပြုပြီးတော့ ကြည်နူးမူရတာလည်း ကျေနပ်စရာကောင်းတယ်၊ 🔸 သံဃာဂုဏ်ကို အာရုံပြုပြီးတော့ ကြည်နူးမူရတာလည်း ကျေနပ်စရာကောင်းတယ်။ ❖ ကိုယ့်သီလကို ကိုယ်ဆင်ခြင်ပြီးတော့ ကျေနပ်မူရတာလည်း ကြည်နူးမူရတာလည်း ကျေနပ်စရာကောင်းတယ်၊ ကျေနပ်စရာ(၅)မျိုး ဘ၀မှာကျေနပ်စရာတွေ။ ❖ မြတ်စွာဘုရားက အဲဒီအချက်အလက်တွေနဲ့ ပြည်စုံရင် နောက်ဘ၀တွက် မစိုးရိမ်နဲ့တော့ စိုးရိမ်စရာမရှိတော့ဘူး။ ငရဲမရှိတော့ဘူး။ တိရစ္ဆာန်ဖြစ်ဖို့ မရှိတော့ဘူး။ ❖ အခက်အခဲကြုံတိုင်း အခက်အခဲကြုံသည်ဖြစ်စေ မကြုံသည်ဖြစ်စေ ကိုယ့်ဘ၀မှာ အမှတ်ရနေရမှာကတော့ မြတ်စွာဘုရားပဲ၊ ဘုရားရဲ့ဂုဏ်တော်တွေကို အမှတ်ရလိုက်ပါ၊ ဘုရားကို အာရုံပြုပြီးတော့ နုလုံးသွင်းဆင်ခြင်နေပါ။ တရားကို အာရုံပြုပြီးတော့ နုလုံးသွင်းဆင်ခြင်နေပါ။ ❖ ဒေါသကင်းတဲ့အကျင့် ကောင်းမြတ်တဲ့အကျင့် မေတ္တာတွေပွားပါ ပွားလို့ရှိရင် အဲ့ဒါတွေဟာ နတ်ပြည်ရောက်ဖို့ရာအတွက် ကောင်းရာသုဂတိ ရောက်ဖို့ရာအတွက် ဖြစ်ပါလိမ့်မယ်။ ကိုယ့်မှာလှူစရာတွေရှိရင် ကုသိုလ်ရှာတဲ့ ပုဂ္ဂိုလ်ဆိုလို့ရှိရင် ကိုယ်ကျင့်သီလနဲ့ ပြည့်စုံပြီးတော့ ကိလေသာ ငြိမ်းအောင်ကျင့်နေတဲ့ ပုဂ္ဂိုလ်တွေကို လှူလိုက်ပါ။ မင်းလှူတဲ့ အလှူဟာ အင်မတန်မှ ကြီးကျယ် ကျယ်ပြန်တဲ့အကျိုးတရားတွေ မင်းဆီယူဆောင်လာပါလိမ့်မယ်။ ❖ ငါးပါးသီလပြည့်စုံတယ်၊ ဘုရားဂုဏ်ကို အာရုံပြုနိုင်တယ်၊ တရားဂုဏ်ကို အာရုံပြုနိုင်တယ်၊ သံဃာဂုဏ်ကို အာရုံပြုပြီး လှူနိုင်တန်းနိုင်တယ် ကျေနပ်စရာကြီးပေါ့။ ဘ၀မှာ ကျေနပ်စရာကောင်းတဲ့ အချက်တွေရလာပြီဆိုရင် ငါတို့ဟာ တကယ့်အရတော်တဲ့ လူဘ၀ရပြီဆိုပြီးတော့ ကိုယ်စီကိုယ်စီ ၀မ်းမြှောက်၀မ်းသာဖြစ်ကြရမှာဖြစ်တယ်။ ကျေးဇူးတော်ရှင်ပါမောက္ခချုပ်ဆရာတော်ဘုရားကြီး 🙏🙏🙏🙏🙏🙏🙏🙏🙏🙏🙏🙏🙏🙏🙏🙏 "လူ့ဘဝမှာ ကျေနပ်စရာများ" တရားတော် မှ ကောက်နှုတ်ချက်ဖြစ်ပါသည်။ credit :