အလင်းရောင် ဓမ္မ: "ဆိုဆုံးမ လွယ်သူ ဖြစ်ပါစေ တစ်ချိန်မှာ "အရှင်အာနန္ဒာ"ကိုယ်တော်မြတ်က နေ့အခါမှာ "ဖလသမာပတ်"ကို ဝင်စားပြီး "သမာပတ်"မှ ထတော်မူတဲ့အခါ သူကနည်းနည်း စဉ်းစားပါတယ်။ ဘယ်လိုစဉ်းစားလည်း ဆိုတော့... "ရဟန်းတရား-မည်သည်က- "သြဝါဒက" - ဆိုဆုံးမ တတ်သော၊ "အနုသာသက" - အဖန်ဖန် အထပ်ထပ် ဆိုဆုံးမ တတ်သော , "သြဝါဒက" - တစ်ကြိမ်တစ်ခါ ဆိုဆုံးမတတ်သော၊ "အနုသာသက" - ထပ်ခါထပ်ခါ ဆ်ိုဆုံးမတတ်သော ..."။ "ဆုံးမပုံနည်း" သာသနာတော်မှာ "နှစ်နည်း"လာရှိပါတယ်။ နံပါတ်(၁)-က "သြဝါဒက", နံပါတ်(၂)-က "အနုသာသက" ဆိုပြီး ဒီလို တွဲတွဲပြီးသုံးပါတယ်။ တစ်ကြိမ်တစ်ခါ ဆိုဆုံးမတာကို "ၾသဝါဒ"၊ ကြိမ်ဖန်များစွာ ထပ်ခါထပ်ခါ ဆိုဆုံးမတာနေတာကို "အနုသာသန "ဒီလိုလည်း ဆိုတယ်။ နောက်တစ်ခုက- "ရိုးရိုး ဆိုဆုံးမ"တာက " သြဝါဒ" ၊ "အပြစ်ကိုပြပြီး ဆိုဆုံးမ"တာက- "အနုသာသန" ။ ဒီ"အနုသာသန"ကြတော့- ရှေးရှေး"ဆရာတော် ဘုရားကြီးများ"က, "ကံမြစ်တယ်"လို့ သုံးပါတယ်။ "ကံမြစ်တယ်"ဆိုတာ ဘာပြောတာလဲ?။ "အပြစ်"တွေကို ထင်ရှားပြပြီးတော့ "မပြောဆို,မဆုံးမခဲ့ဘူး"ဆိုရင် ထို"ပုဂ္ဂိုလ်ရဲ့ သန္တာန်"မှာ "အကုသိုလ်တရား"တွေ တိုးပွားတော့မယ်။ ဒီ"အကုသိုလ်ကံ"တွေကို တားမြစ်စေချင်လို့ - "ကံမြစ်တယ်"-လို့ သုံးပါတယ်။ "အပြစ်ကိုပြပြီး ဆိုဆုံးမ"တာ မိမိတို့အတွက်- အကျိုးရှိသလား/မရှိဘူးလား?မေးရင် ဘယ်လိုဖြေမလဲ? ။ အကျိုး ရှိတယ်။ "ပုဂ္ဂိုလ်တစ်ယောက်"က "အပြစ်ပြပြီးလာဆိုဆုံးမ"ရင်- "ငါ့ကို ရွှေအိုးကြီး လာပေးတာဘဲ"လို့ ဒီလိုစိတ်ထဲမှာ ထားရမယ်။ "သူတော်ကောင်း"ဆိုရင်ပေါ့နော်။ "ဒင်းကငါ့ကို ပြောရကောင်းလား?"ဆိုပြီး မာန်ထောင်ရမလား?။ ပြန်ပြီးတော့ကော ရန်တွေ့ ရမလား?။ ရန်မတွေ့ရဘူးနော်။ "သူတော်ကောင်း"ဆိုတာ ဒီလိုစိတ်ထားလေး ထားရပါမယ်။ စံနမူနာထား ပြထားတာတော့ "အရှင်ရာဟုလာ မထေရ်"ပါ။ "စင်္ကြာဝတေးမင်း"ဖြစ်နိုင်တဲ့ "ဘုန်းကံပါရမီ"ရှိနေတဲ့ "သူတော်ကောင်း"ပါ။ သို့သော်-"ပစ္ဆိမပုရိသ" အစစ်ဖြစ်တော့ ဒီဘဝမှာ "အရဟတ္တမဂ်ဖိုလ်"ကို ဧကန်ရနိုင်သူ ဖြစ်ပါတယ်။ ဒါကြောင့် "စင်္ကြာဝတေးမင်း" စည်းစိမ်ကို "စွန့်လွတ်နိုင်တဲ့ စွမ်းရည်"တွေ ပါရှိတဲ့ "သူတော်ကောင်း" ဖြစ်ပါတယ်။ သူက "ဘုရားရှင်ရဲ့ သားတော်"လည်းဖြစ်တယ်။ "(၃၂)ပါးသော ယောကျာ်းမြတ်ရဲ့ လက္ခဏာတော်"တွေနဲ့လည်း ပြည့်စုံပါတယ်။ အခြားရဟန်းတွေက- "ပြောဆိုဆုံးမတာ ဘယ်လောက်များ လိုက်နာသလဲ"-ဆိုတာ သိချင်လို့ "အရှင်ရာဟုလာ"ကို စမ်းစမ်းကြည့်တယ်။ ဘာလုပ်သလဲ?။ ဒီနေရာမှာ "အမှိုက်"တွေသွား ဖြန့်ကြဲထားလိုက်တယ်။ " ရာဟုလာ… ဒီနေရာမှာ အမှိုက်တွေ လာပြီး ဖြန့်ပစ်ထားရသလဲ" ဒီလို စမ်းတယ်။ " အရှင်ဘုရား… တပည့်တော်ကို ဒီလို မဟုတ်တာတွေ လာပြီး စွတ်စွဲရသလဲ၊ ဒါ တပည့်တော် လုပ်တာမဟုတ်ဘူး" -လို့ ဘယ်တော့မှ ပြန်မပြောဘူး တဲ့။ ဘယ်လောက်ကောင်းလဲ ။ ဘယ်လိုပုဂ္ဂိုလ်လဲ?။ "ဘုရားရှင်ရဲ့ သားတော်"ဖြစ်ပါတယ်။ "မင်းသား"လည်းဖြစ်တယ်။ နှိုက်လို့မကုန်အောင် ပြည့်ပြည့်တက်လာတဲ့ "ရွှေအိုးကြီးလေးလုံး"လည်း ပိုင်ဆိုင်နေတဲ့ "သိဒ္ဓတ္ထမင်းသားရဲ့ သားတော်"ဖြစ်တယ်။ "ရုပ်"ကလည်း အင်မတန်ချောတယ်။ သူကိုယ်တိုင်ကလည်း "စင်္ကြာမင်း"ဖြစ်နိုင်တယ်။ အဲ့ဒီလို "ပုဂ္ဂိုလ်တစ်ယောက်"တောင်မှနော်၊ " အရှင်ဘုရား… တပည့်တော်ကို မဟုတ်မတရားတွေ လာပြောနေရသလဲ"-လို့, "ရဟန်း"တွေကို တစ်ခါမှပြန်မပြောဘူး တဲ့။ "အမှိုက်"တွေကို ရိုသေစွာ ကောက်, တစ်နေရာသွားပြီး စုပုံပြီး ပစ်လိုက်တာဘဲနော်။ ဒါဘာပြောချင်တာလဲ? "သိက္ခာသုံး ပါ အကျင့်မြတ်တရား"ကို "လိုလားတောင့်တတဲ့ သူတော်ကောင်း"-ဆိုတာ -"ပြောဆိုဆုံးမပြီ"ဆိုရင်, -"ရိုရိုသေသေလေးနဲ့ ခံယူတတ်တဲ့ စိတ်ထား" -"ခံယူနိုင်တဲ့ စွမ်းအား"ကို မွေးမြူပေးရပါတယ်။ "အရှင်ရာဟုလာ"ဟာ ဘယ်လောက်ထိ မွေးမြူသလဲ"-ဆိုရင်, တစ်နေ့ တစ်နေ့ "သဲလေး"တွေ ကျုံးကျုံးပြီး "ဘုရားရှင်၏ ကျောင်း"နားမှာ အမြဲဖြန့်ခင်းပေးတယ်။ ဘာဦးတည်ချက်ရှိလဲ? "ဘုရားရှင် ထံမှ သဲတို့နှင့် အမျှသော ဆိုဆုံးမမှုတွေ ရ ရပါလို၏။ ငါ၏ ဥပဇ္စျာယ်ဆရာဖြစ်တော်မူသော အရှင်သာရိပုတ္တာ ၏ ဆိုဆုံးမမှုတွေ ဤ သဲထုနှင့်အမျှ ရရပါလို၏။ " -ဆိုပြီး, ဆိုဆုံးမချက်ကို အလွန်မျှော်လင့်တောင့်တ ပါတယ်။ "ဘုရားရှင်ကဲ့သို့သော ပုဂ္ဂိုလ်တစ်ယောက် ဆိုဆုံးမရင် အကျိုးရှိမယ်"ဆိုတာ ယုံကြည်ချက် အပြည့်အဝရှိတယ်။ တရားနာ ပရိသတ် တွေ… ဘုန်းကြီး နှိမ်ချပြောတာ မဟုတ်ပါဘူး။ မေးကြည့်တာပါ။ ဘုန်းကြီး အပါအဝင် ပါ။ ဒီထဲ "စင်္ကြာဝတေးမင်းဖြစ်မယ့် ပုဂ္ဂိုလ်" ဘယ်နှစ်ယောက်များပါလဲ?။ "စင်္ကြဝတေးမင်း"ထားပါတော့- "စင်္ကြာမင်းရဲ့ မိဖုရား ဖြစ်မယ်သူ" ဘယ်နှစ်ယောက်များပါလဲ?။ မပါ ပါဘူး။ သိပ်"မာနကြီးစရာ" မလိုပါဘူးနော်။ ဒီလိုဆို- "အိမ်က ဆန်အိုး"ထဲ သွားနှိုက်လိုက် "ဆန်"တွေပြန်များပြည့်လာသလား? မပြည့်ပါဘူး။ ဟိုမှာ "ရွှေအိုးကြီးလေးလုံး" နှိုက်လိုက် ချက်ခြင်းပြန်ပြည့်တယ်။ လျော့သွားတယ်လို့ မရှိဘူး။ အဲ့ဒီလောက် "ချမ်းသာပြီး အဆင့်မြင့်နေတဲ့ သူတော်ကောင်း"တွေ တောင်မ ှ မိမိတို့ကို လာပြီး ပြောဆိုဆုံးမရင်- "ငါ့ကို ပြောရကောင်းလား" ဆိုတဲ့ စိတ်ထား နည်းနည်းမှ မထားဘူး တဲ့။ ဒီနေ့ တရားနာနေတဲ့ သူတော်ကောင်းတွေကော, အဲ့ဒီစိတ်ထားလေး ရှိနိုင်ပါ့မလား?။ သူတစ်ပါးတို့က အကျိုးလိုလားလို့ ပြောဆိုဆုံးမရင် နာယူသင့်သလား /မနာယူရမလား?။ တကယ်ကော လိုက်နာနိုင်ပါ့မလား?။ ဘုန်းကြီး ကတော့ သိပ်မယုံချင်ဘူးနော်။ ဒ်ီမှာ "အရှင်အာနန္ဒာရဲ့ စဉ်းစားခန်းလေး"ပါ။ ဒီ"သမဏ" အမည်ရတဲ့ "ရဟန်းတရား"မည်သည်- -ဆိုဆုံးမမှုရှိရမယ်။ -ကြိမ်ဖန်များစွာထပ်ကာထပ်ကာ ဆိုဆုံးမမယ့် ပုဂ္ဂိုလ်ရှိရမယ်။ -အပြစ်ကိုထောက်ပြပြီး ဆိုဆုံးမမယ့်သူ ရှိရမယ်။ -အဲ့ဒီလို ဆိုဆုံးမတတ်တဲ့ ဆရာကောင်းသမားကောင်း၊ မိတ်ကောင်းဆွေကောင်း ရှိခဲ့မယ်-ဆိုရင် "ဇွဲလုံ့လ ဝီရိယဖြင့် ကျင့်ကြံကြိုးထုတ်လို့ ရနိုင်မယ့် ပုဂ္ဂိုလ်တွေ၏ သန္တာန်မှာသာ တရားရရှိနိုင်ပါတယ်"တဲ့။ ဒီတော့- -"ဆိုဆုံးမတဲ့ ပုဂ္ဂိုလ်"လည်း ရှိရမယ်။ -"ကြိုးစားအားထုတ်တဲ့ လုံ့လဝီရိယနှင့် ပြည့်စုံတဲ့ ပုဂ္ဂိုလ်"လည်းဖြစ်ရမယ်။ အဲ့ဒီလို"ပုဂ္ဂိုလ်ရဲ့ သန္တာန်"မှာသာလျှင် - "သမဏဓမ္မ"အမည်ရတဲ့ "စျာန်မဂ်ဖိ်ုလ်ဆိုတဲ့ ရဟန်းတရား"တွေ ပြည့်စုံလာနိုင်မယ် ဖြစ်ပါတယ်။ "ဖားအောက်တောရ ဆရာတော်ဘုရားကြီး" Cradit By-Bhikkhu's Dhamma [“မည်သူမဆို…, လွတ်လပ်စွာ ကူးယူ ဓမ္မဒါန ပြု နိုင်ပါသည်။ "ဓမ္မဒါန ပြု မည်"ဆိုပါ လျှင်…, "မူရင်း ဟောကြား/ရေးသားသူ ၏ အမည်"နှင့် "ဓမ္မဒါန ပူဇော်သူ - ကိုညီညီတင်"(ဥာဏ်လင်းမြို့)"-ကို "Credit"-ပေးပါရန် မေတ္တာရပ်ခံအပ်ပါသည်။”] ၁၃၈၀ ပြည့်နှစ်၊ ပထမ ဝါဆိုလဆန်း(၇)ရက်နေ့ (၁၉-၆-၂၀၁၈)ရက်နေ့၊အင်္ဂါနေ့- (နံနက်-၅ း၃၅) ချမ်းသာကြပါစေ၊ အေးငြိမ်းကြပါစေ၊ သံသရာ ၀ဋ်ဆင်းရဲမှ လွတ်မြောက်နိုင်ကြပါစေ။ ဘ၀တု သဗ္ဗမင်္ဂလံ Cr# ကိုညီညီတင် (ဥာဏ်လင်းမြို့)