အလင်းရောင် ဓမ္မ: ကိုယ့်သာသနာက ကိုယ့်တစ်သက် •••••••••••••••••••••••••••••••••• သာသနာနှစ်ပေါင်းနှစ်ထောင်ကျော် ကျန်သေးတယ် ဆိုတာကလည်း အထိန်းအသိမ်းအစောင့်အရှောက်ကောင်းရင် လောကအတွင်းမှာ ရှိနိုင်တာကိုပြောတာ၊ သို့သော် အကုန်လုံးက ကိုယ့်သာသနာဟုတ်ချင်မှဟုတ်မှာဗျ။ 💿 မိမိက မနက်ဖြန်ပဲ သေတော့မယ်ဆိုရင် ကိုယ့်သာသနာ ဒီတစ်ညပဲ ကျန်တော့တယ်ပေါ့။ 💿 မိမိကနောက်တစ်လမှာ သေတော့မယ်ဆိုရင် မိမိရဲ့သာသနာက (ကိုယ့်သုံးရမယ့် သာသနာက) တစ်လထဲသာ ကျန်တော့မယ်ပေါ့။ 💿 မိမိက နောက် ၁-နှစ်(လာမယ့်နှစ်)မှာ သေတော့မယ်ဆိုရင်၊ ကိုယ့်သာသနာက တစ်နှစ်ထဲသာ ကျန်တော့မယ်ပေါ့။ 💿 ဒါကြောင့် ကိုယ်နဲ့ဆိုင်တဲ့ သာသနာကတော့ ကိုယ်တစ်သက်ထဲ ရှိမှာ။ ဒါကြောင့် သာသနာနဲ့တွေ့ခိုက်ကြုံခိုက်လေးမှာ လျင်မြန်ဖျတ်လတ်စွာ သေသေချာချာ ကြည့်ပြီးတော့ ရှောင်သင့်သာ လုပ်သင့်တာတွေပြတ်သားစွာကြည့်ပြီးတော့ ရှောင်သင့်တာရှောင်၊ ဆောင်သင့်တာဆောင် လုပ်သင့်တာတွေ အကွက်စေ့နေအောင် လုပ်ပြီး ကြိုးစားအားထုတ်ကြရမှာ။ ဒါကြောင့်_ 💿 ဗုဒ္ဓညွှန်းကြား၊ မြတ်တရားကြောင့်၊ အမှားကင်းစင်၊ စိတ်ကြည်လင်၊ အမြင်ရှင်း၍လာ။ 💿 အခု အကုသိုလ်မှန်း သိနေကြတယ်၊ကုသိုလ်မှန်း သိနေကြတယ်။ ရှောင်သင့်တာတွေ သိကြတယ်။ လုပ်ရမှာလည်းသိနေကြလို့ ကြိုးကြိုးစားစား ပြုလုပ်အားထုတ်နေကြပါတယ်။ 💿 ဘဝပင်လယ်၊ ခရီးသည်၊ တကယ်စိတ်အေးပါ။ 💿 ဘဝပင်လယ်ကြီးထဲမှာ သံသရာခရီးသည်တစ်ယောက် ဖြစ်ရငြားသော်လည်း ဗုဒ္ဓသာသနာ အလင်းရောင်အောက် ရောက်နေတာဖြစ်လို့ အားရှိစရာ တရားစွမ်းအားတွေကို စိတ်ကြိုက်ရယူနိုင်ကြပါတယ်။ ဒါကြောင့် အပ္ပမာဒေန - မမေ့မလျော့ မပေါ့မတန် ထက်သန် ထူးခြား၊ အပ္ပမာဒသတိ_ တရားဖြင့်၊ အဏ္ဏဝံ - ကမ်းလည်းမမြင် လမ်းမမြင်ရ ကျယ်ဝန်းလှသည့် ဘဝပင်လယ်မြစ်ပြင်ကျယ်ကြီးကို၊ တရတိ- ဘဝပင်လယ်ခရီးသည်ဟု တကယ်ထူးကာ ကောင်းစွာမသွေကူးမြောက်နိုင်ပါပေတော့သတည်း တိပိဋကဓရ ဓမ္မဘဏ္ဍာဂါရိက (ယောဆရာတော်ဘုရားကြီး)