အလင်းရောင် ဓမ္မ: ဘဝမလှတဲ့ မယ်သီလပါ အမေ ************************ ဖတ်ကြည့်နော်… ဆံပင်မပါ ကတုံးမို့ လူတကာပြုံးလို့ မစာနာ နွမ်းကျေကာ ဖာတရာစုပ် တစ်ကျပ်တစ်ပြားထုတ်ဖို့ တုန်လှုပ်ကြတာ လူသဘော သမီးမမက်မောပါဘူး အမေ။ မယ်သီလဘဝ အစစ မပြည့်စုံ လှူကြဖုံဖုံ မျက်နှာချိုသွေး လူတကာအရေးမပေးလည်း နေရာတစ်ခုအတွက် သာသနာပြုနေသူပါ အမေ။ ပေတစ်ရာဆိုတာ မယူတတ်သူအတွက် နွမ်းပူကာ ဒေါသပုန်ထ မောကြမှာပေါ့ အမေရယ်။ သောကခြေရာ ဖြည့်ကာမိုး ဒုက္ခဆိုးတွေ ပြေပျောက်ဖို့ ဘုရားရှင် ဒီအရိပ်အောက် သမီးဝင်ရောက်ခဲ့တယ် အမေ။ ကိုယ့်ဝမ်းပူစာ မနေသာအရေး မောင်းထောင်ခွက်ကလေး ရင်မှာပိုက် တပတ်မှာနှစ်ရက် ပေတရာထက်က နွေကမ္ဘာထက် ပူသလို မိုးရွာတဲ့ရက်တွေမှာလည်း ဆွမ်းခံထွက်ရင်း ရေကစို ဟိုဂျောင်ဝင် ဒီတိုးကပ် မကြည်လင်တဲ့ မျက်နှာ ပြုံးဟန်လုပ်ကာလည်း ဖုံးခဲ့ရတယ် အမေ။ တစ်ဇွန်းဆန်အတွက် ဂျွမ်းပျံကာပြေးလွှား ခြေပူကာ ခေါင်းပြောင်လျှက် ဝမ်းဟာချက် မနေသာရင်ဖြင့် ရေဆာကာ အပူဖျောက်ဖို့ အရိပ်ကောင်းတဲ့ အပင်အိုမှာ ခဏခို ရင်ဆိုင်မနှေး ယိုင်နှဲ့မပြိုတဲ့ ရေအိုးစင်ကလေးကို အပြေးတိုးလို့ ဖွေရှာရ အမောဖြေ သမီးတို့ ဘဝမလှပပါဘူး အမေ။ လောကဓံ ဆိုတာ… တစ်ခါတစ်လေ အခွင့်ပေးလို့ ငါးခြောက်ကလေးတပြား ဆန်ဖြူဖြူဖွေးများရရင် လမ်းလျှောက်ရတာ မြေမထိ ပြုံးစိစိနဲ့ ပီတိဖြာ သာဓုခေါ်ရတာ အကြိမ်ကြိမ် ကျောင်းပြန်ချိန် စန်းတွေထ တပတ်စာအတွက် ရင်တွေတုန် စားကြုံလို့ ပျားအုံဆွဲ သမီးမမောတဲ့ အခါလည်း ရှိခဲ့ဘူးတယ် အမေ။ တစ်ခါတစ်လေ ဆွမ်းခံရင်း ငှတ်တော့မသင့် ခွေးမချစ်တော့ အပြစ်မြင် ထိုးဟောင်ခြင်းရှေ့ကာဆွဲ ပြေးပေါက်လွဲလို့ လမ်းပျောက် နောက်ကျတဲ့ ခြေထောက် ခွေးဆွဲမှာ ကြောက်လို့ ဖနောင့်နဲ့ တင်ပါး တသားထဲဖြစ်တဲ့အခါတွေလည်း ရှိခဲ့ဘူးတယ် အမေ။ စတိုးဆိုင်က ဟီးဟီးထ ဆိုင်ကြီးက ကျယ်ကျယ် လွယ်တယ်ကွယ် လက်မနှေး သူဌေးကြီး ဂိုက်ကိုဖမ်း သဒ္ဓါစွမ်းက လွန်စွာမွဲ မှိုတတ်ဆဲ မုန့်တွေထုပ် ကိတ်မုန့်တွေက ပျော့စိတွဲ ဒိတ်လွန်ကဲတဲ့ အချိုရည် မငြီးယူလာ အလှူပေး လမ်းဘေးမှာ အသာပြစ် စိတ်ညစ်ခဲ့ရတဲ့ ရက်တွေလည်း ရှိခဲ့ဘူးတယ် အမေ။ ပြောတော့ ဆန်ပွဲစား လောင်းတာက အညံ့ဆန် ရေဆိုပြန် ဝါဝါတမ်း ဆန်ကြမ်းကို ဇကွဲနဲ့ရော မမောပဲ အိတ်လိုက်ချ စားမရတဲ့ ဒီလိုဆန် အလှူခံရတာလည်း ရှိတယ်။ ဒါနရှင်တေးကိုဆို သဒ္ဓါပိုအောင် သံကုန်ဟစ် မြင်သူချစ်အောင်နေရတာ သမီးတို့ဘဝ မလွယ်လှပါဘူး အမေ။ ကျောင်းမပြန်ခင် စျေးကိုဝင် လိုချင်တာရှိတော့ ဆိုင်ရှေ့ရပ် မျက်နှာပေါက်က ခပ်ဆိုးဆိုး မျက်နှာသိုးလို့ မမြင်ဟန် လှည့်မပြန်ရင် ကန်တော့ဆွမ်း မျက်နှာပန်း တကယ်မလှ ပြန်ကြွရတာလည်း ရှိခဲ့ဘူးတယ် အမေ။ ကန်စွန်းရွက် ချဉ်ပေါင် မငြီးအောင်နေ့စဉ်ချက် ကျောင်းနောက်ဖက်က မကျီးပင် သူအရင်ငါတက် ခူးရတဲ့ရက်တွေလည်း ရှိခဲ့ဘူးတယ် အမေ။ မြတ်ဘုရား သာသနာ ဒေါက်တိုင် ကျောက်တိုင်ပမာ အုတ်တချပ် မဖြစ်ရင်နေပါစေ ကျရာတာဝန်ထမ်းပြီး မပင်ပန်းတဲ့ ဘုရားသမီးအဖြစ် သဲပွင့်ကြီးကြီးတော့ ဖြစ်ချင်တယ် အမေရယ်။ ဘာပဲဖြစ်ဖြစ်ပေါ့… လောကီနယ်တခွင် သံယောဇဉ်တွေကို ဖယ်ခွါ သီလတွယ်ကာ ဘဝကြမ်းကြမ်း အလှတွေ ဘယ်လိုနွမ်းပါစေ ဓမ္မစာပေကျမ်းစာတွေနဲ့ အမတနန်းကို ဖွေရှာလို့ သမီးပျော်အောင် နေပါ့မယ် တမလွန်ဘဝကနေ ဂုဏ်ယူဝမ်းသာလိုက်ပါ မေမေရယ်။ Credit : မေတ္တာဖြင့်…ပြန်လည်မျှဝေပါသည်။