အလင်းရောင် ဓမ္မ: ❝ဘုရားလောင်း အလုပ်/လုပ်နည်းလမ်း ၅မျိုး ❞ 🙏🙏🙏🙏🙏🙏🙏🙏🙏🙏🙏🙏 ✪ ပြည့်စုံတဲ့ဘဝတစ်ခုသို့ " ဘုန်းကြီးတို့အသက်(၈၀)ကျမှ တော်တော်များများ ပြည့်စုံတာဗျာ။ ဒီလိုပြည့်စုံအောင် ဘယ်လိုလုပ်ခဲ့ရလဲဆိုတော့ အကြာကြီး လုပ်ရတာ။ ဘုရားအလောင်းနည်းလမ်း(၅)မျိုးနဲ့ လုပ်တယ်။ ➊• စိရကာလ ဘာဝနာ … ✧လုပ်ငန်းတစ်ခုကို ကြီးကြီးကျယ်ကျယ်တွေးကြံ အောင်မြင်ဖို့ဆိုတာဟာ အကြာကြီးလုပ်ရတာ။ ခဏတစ်ဖြုတ်လေး လုပ် တော်ကြာ နောက်တစ်ခုပြောင်း ဒီလိုလုပ်နေရင် ဘယ်တော့မှ ကြီးကျယ်တဲ့အရာတွေကို မလုပ်နိုင်ဘူး။ ဒါ့ကြောင့် အလုပ်တစ်ခု လုပ်ရင် အကြာကြီးလုပ်။ ➋• နိရန္တရ ဘာဝနာ …… ✧မရပ်မနားကို လုပ်ရတာ။ ဘုရားအလောင်းသိဒ္ဓတ္ထ ဥရုဝေလမှာ ၆ နှစ်ကျင့်တုန်းက အနားယူ အပန်းဖြေတယ်ဆိုတာ စာထဲတွေ့ဖူးလား။ ဥပုသ်နေ့လည်းနားဦးမယ် ရှိလား။ အခုတော့ ဥပုသ်နေ့ဆိုတာနဲ့ စာတွေနားပြီးနေကြတယ်။ ဘုရားအလောင်း ဥပုသ်နေ့နားတယ်ဆိုတာ မရှိပါဘူး။ ဒို့ မနားဘူး။အနားမရှိဘူး အခုထိလုပ်တယ်။ ➌• နိရဝသေသ ဘာဝနာ …… ✧ ကောင်းတယ် ဆိုတဲ့အလုပ် ကောင်းမှု ဆိုတဲ့အလုပ် ဘာမှ ချန်မထားနဲ့။ ဘုရားပန်းကပ်မယ် / ပန်းတော်ကပ်မယ်/ ရေမလဲဘဲ အလုပ်မသွားနဲ့။ ပန်းတော့ ကပ်တယ် ဘုရားခန်း တံမျက်စည်း မလှည်းဘဲ ထွက်မသွားနဲ့။ ဆွမ်းတော့ ကပ်တယ်။ ဆွမ်းနဲ့ ထန်းလျှက်ခဲလေးတင် မကပ်နဲ့။ ဟင်းလေးလည်းထည့်။ ကောင်းမှု မှန်သမျှ ဘာမှမကျန်စေနဲ့။ ဘုန်းကြီးတို့ ကြိုးစားပြီးတော့ လုပ်တာ။ ✧ အများကြီးပဲ။ ဆေးရုံတွေရော ရေတွေရော ငတ်ပြတ်နေတယ်ဆိုရင်လည်း သွားကျွေးတာပဲ။ ရေနစ်ဆိုလည်း သွားကူတာပဲ။ မီးလောင်လည်း သွားပေးတာပဲ။ ကောင်းမှု မှန်သမျှ အကုန်လုပ်။ အဲ့ဒါ ဘာခေါ်သလဲ- နိရဝသေသ ဘာဝနာ။ ဒို့ကတော့ ဒါလေးပဲ ဆိုရင် အဲ့ဒီဘက်မှာပဲ အဲ့ဒီလူ ထူးချွန်သွားလိမ့်မယ်။ ဒီပြင်ဟာတွေ ကျန်နေခဲ့တတ်တယ်။ ➍• သက္ကစ္စ ဘာဝနာ …… ✧ ရိုရိုသေသေ လေးလေးစားစား လုပ်ကြ။ ပေါ့ပေါ့ဆဆ မလုပ်နဲ့။ ✧ မင်္ဂလာသုတ်ဖတ်လိုက်ရင် ဘဂဝါ သာဝတ္ထိယံ ဝိဟာရတိ ဇေတဝနေ အနာထပိဏ္ဍိကဿအာရာမေ။ ဘယ်သုတ္တံ ဖတ်ဖတ် အနာထပိဏ္ဍိကဿအာရာမေတွေ များဘူးလား။ ✧ ပုညလက္ခဏဒေဝီအာရာမေ -- ဆိုတာ တစ်သုတ်မှ မရှိဘူး။ ပုညလက္ခဏဒေဝီက အနာထပိဏ်ရဲ့ ဇနီးလေ။ကောင်းမှု နှစ်ယောက်လုပ်တာ တစ်ယောက်ထဲ နာမည်ထွက်တယ်။ တစ်ယောက်က နာမည်ပျောက်နေတယ်။ ✧ ဘာဖြစ်လိုလဲ မရိုမသေ အသက္ကစ္စ ဒါန လုပ်တဲ့ ပုဂ္ဂိုလ်ဟာ မကျော်ကြားဘူး။ သက္ကစ္စဒါန- လုပ်တဲ့ ပုဂ္ဂိုလ်က ဘာဖြစ်လဲ ကျော်ကြားတယ်။ ဒါ့ကြောင့် သက္ကစ္စဘာဝနာ ရိုရိုသေသေ လေးလေးစားစား အလုပ်လုပ်ကြပါ။ ပေါ့ပေါ့ဆဆ မလုပ်နဲ့။ ✪#နံပါတ်(၅)က #အဘိရတိ ဘာဝနာ …… ✧ ပျော်ပျော်ပါးပါးလုပ်။ ဆရာလေးတွေ သိတာပေါ့ သီတဂူဆိုတာ ရေပေးတာ။ ဆေးရုံဆောက်တာ ဘာလုပ်တာ တရားဟော ဘယ်လောက်ပျော်သလဲ မေးရင် အခုထိ ပျော်တုန်းပဲ။ ပျင်းသွားပြီ ငြီးငွေ့သွားပြီ မရှိပါဘူး။ ကောင်းမှုဆိုတာ ငြီးငွေ့စရာလား။ မကောင်းမှုကတော့ ခပ်မြန်မြန် ငြီးငွေ့မှအဆင်ပြေမယ်။ ✧ အဲ့ဒီတော့ တစ်စုံတစ်ခုသော အလုပ်ကို လုပ်မယ်ဆိုရင် ထိပ်တန်းတစ်နေရာ ရောက်ချင်ရင် နည်းငါးပါးနဲ့ ဘုရားအလောင်း လုပ်သလို လုပ်ကြ။ 【ကျေးဇူးရှင် သီတဂူဆရာတော်ဘုရားကြီး】 ❁ အပ္ပမာဒေန သမ္မာဒေထ ❁ ✦ရွှင်လန်း✦အေးချမ်း✦ပါစေ✦