အလင်းရောင် ဓမ္မ: #သင်္ခါရတရားပျက်တယ်လို့သိအောင်လုပ် •••• ➖➖➖➖➖➖➖➖➖➖➖➖ #မိုးကုတ်ဆရာတော်ဘုရားကြီး ➖➖➖➖➖➖➖➖➖ 🔵 အကြောင်း တိုက်ဆိုင်လို့ ပေါ်လာတာ သင်္ခါရ ၊ မပိုင်မဆိုင်လို့ ပျက်သွားတာ သင်္ခါရ ၊ အဲဒီလို ဥာဏ်နဲ့ သိရတယ် ၊ အဲဒီလို သိတော့ ••• ငါ ၊ သူတစ်ပါး ၊ ယောက်ျား ၊ မိန်းမလို့ စွဲနေတဲ့ သက္ကာယ ဒိဋ္ဌိပြုတ်သွားတာပဲ ၊ ဒီအချက်ဟာ အလွန်ပဲ အရေးကြီးတယ် ၊ #သင်္ခါရပျက်တာမမြင်ရင်_ဒိဋ္ဌိမကွာဘူး ••• ငါစွဲ ၊ ငါ့ဥစ္စာစွဲ မပျောက်ဘူး ၊ ဒီအစွဲမပျောက်ရင် ••• ဒကာတို့ သေရင် လိုက်မပို့နဲ့တော့ ••• အပါယ်တန်း သွားမယ်ဆိုတာ မှတ်ကြတော့ ။ 🔵 " ဘယ်စိတ်ပေါ်ပေါ် ကြည့်ပေးရမယ် ၊ ပေါ်လာတာ သင်္ခါရ ၊ ပျက်သွားတာ အနိစ္စ ၊ ဒါကို ဥာဏ်နဲ့ မြင်ဖို့ အရေးကြီးတယ် ၊ ဒွါရခြောက်ခုက ပေါ်လာသမျှ ဒီအတိုင်း မြင်အောင် ကြည့်ပေးကြ ၊ ⏩ ကြားစိတ်ကလေး ပေါ်လာလည်း ဖြစ်ပြီး ပျက်သွားတာ မြင်အောင် ဥာဏ်နဲ့သာ ကြည့်ပေးကြ ၊ နှာခေါင်းက နံစိတ် ၊ လျှာက စားသိစိတ် ၊ ကိုယ်ကလည်း တွေ့သိစိတ် ၊ မနောကလည်း ကြံစည်စိတ် ၊ တွေးတောစိတ် တစ်ခုခုတော့ ပေါ်မှာပဲ ၊ ပေါ်ရာကို မလွတ်အောင် ကြည့်ကြ ။ ⏩ ပေါ်လာတဲ့ တရားက သင်္ခါရ ၊ ပျက်သွားတာက အနိစ္စ ၊ ဥာဏ်နဲ့ ကြည့်တဲ့အခါ မရှိတာကို သိရမယ် ၊ တစ်ခုမပေါ်ရင် တစ်ခုပေါ်မှာပဲ ၊ ပေါ်ရာကို မလွတ်တမ်း ကြည့်ပေး ၊ လွတ်သွားတာနဲ့ တပြိုင်နက် ကိလေသာ တောထတာနဲ့ တချက်ထဲပဲ ဆိုတာ မှတ်ကြ ၊ ဒီလို ဥာဏ်နဲ့ ကြည့်တော့ ဒါဟာ ငါမဟုတ်ဘူး ၊ သင်္ခါရတရားပဲလို့ သိရမယ် ၊ ဒီသင်္ခါရလေးရဲ့ အဖြစ်ကို သိတော့ အပျက်ကိုလည်း သိတော့တာပဲ ၊ ရှုတဲ့ ဥာဏ်က နောက်ကနေ ဒီအတိုင်းသိ သိနေဖို့ပါ ၊ ဒီလို နောက်ဥာဏ်က တွေးတော သိမြင်တာဟာ ဝိပဿနာ သမ္မာဒိဋ္ဌိ အမြင်ပဲလို့ မှတ်လိုက်ကြ ။ 🔵 " #ဝိပဿနာရှုတယ်ဆိုတာ •••• #သင်္ခါရတရားပျက်တယ်လို့_သိအောင်••• #လုပ်နေရတဲ့အလုပ်ပဲဆိုတာမှတ်ကြ " ⏩ အဆင်းကြောင့် ပေါ်လာတဲ့စိတ် ၊ အသံကြောင့် ပေါ်လာတဲ့စိတ် ၊ အနံ့ကြောင့် ပေါ်လာတဲ့စိတ် ၊ အချို အချဉ်ကြောင့် ပေါ်လာတဲ့စိတ် ၊ အတွေ့ကြောင့် ပေါ်လာတဲ့စိတ် ၊ တစ်ခုခုကြောင့် ပေါ်လာတဲ့ ဓမ္မလေးဟာ သင်္ခါရလေးပဲ ဆိုတာမှတ် ၊ အကြောင်းကြောင့် ပေါ်လာတဲ့ဟာ သင်္ခါရချည်းပဲ ၊ ဒီလို ပေါ်လာသမျှ ပျက်တာချည်းပဲလို့ မှတ်ကြတော့ ။ 🔵 ဒါကြောင့် " သဗ္ဗေသင်္ခါရာ••• ဒကာတို့ သန္တာန် ပေါ်လာကြတဲ့ သင်္ခါရဟူသမျှတွေသည် အနိစ္စာ ••• အပျက်ချည်းမှာသာ လမ်းဆုံးကြရပေကုန်၏လို့ ဘုရားဟောတော်မူတာပဲဆိုတာ ဆုံးဖြတ်ချက်ချကြ ၊ ဒီအခါ ဒကာတို့က " ယဒါပညာယ ပဿတိ " ••• ဖြစ်အောင် လုပ်ကြရမယ်တဲ့ ၊ " ယဒါ ••• သင်္ခါရတရားက အပျက်ချည်းသာ ပြနေသည် ၊ အကြင်အခါ၌ ပညာယ ••• ဝိပဿနာ ရှုဥာဏ်ဖြင့် ပဿတိ ••• ရှုမြင်ရ၏ " သူ့သဘာဝ အမှန်ကို မြင်အောင် ကြည့်ပေးကြရမယ်တဲ့ " " ဝိပဿနာ ဖြစ်ပျက်ကို ကြိုးစားရှုကြ ၊ ဖြစ်တာ ပျက်တာ မြင်အောင်ကြည့် ၊ ဖြစ်ပြီး မရှိဘူးဆိုတာ မြင်ရင် တော်ပြီ ၊ ရှေ့ဆက်ပြီး ကြိုးစားသာ ရှုကြတော့ " ⏩ ဝိပဿနာ တရားမှသာ ဒိဋ္ဌိကိလေသာကို နိုင်နိုင်တယ် ၊ ဝိပဿနာမှသာ သာသနာတွင်း တရားအစစ်မှန်တယ် ၊ ဒါကြောင့် ဝိပဿနာ သမ္မာဒိဋ္ဌိသည် အပါယ်ကို ကျစေတတ်တဲ့ ဒိဋ္ဌိအမိုက်အမှားကို စင်ကြယ်စေတတ်တယ် ဆိုတာ မှတ်ရမယ် ၊ ဒီတော့ ဝိပဿနာ ရှုတဲ့နေ့ဟာ အပါယ်ကျစေတတ်တဲ့ ဒိဋ္ဌိအမိုက်အမှား စင်တဲ့နေ့ပဲ ဆိုတာ မှတ်ကြ ၊ သဘောပါကြရဲ့လား ၊ ကိုင်း ကြိုးစားကြ •••• ။ #စေတနာမေတ္တာများစွာဖြင့် #ဦးကြည်စံ